பொதுத்துறை வங்கியான பஞ்சாப் நேஷனல் வங்கி செயற்கை நுண்ணறிவால் ஏற்படும் ஆன்லைன் மோசடிகள் குறித்து தனது வாடிக்கையாளர்களுக்கு எச்சரிக்கை விடுத்துள்ளது. செயற்கை நுண்ணறிவைப் பயன்படுத்தி போலியான குரல், டீப்ஃபேக் மற்றும் ஃபிஷிங் போன்ற ஆன்லைன் மோசடிகள் அதிகரித்து வருவதாக பஞ்சாப் நேஷனல் வங்கி தனது வாடிக்கையாளர்களை எச்சரித்துள்ளது. இதுபோன்ற சமயங்களில் வாடிக்கையாளர்கள் எச்சரிக்கையாக இருக்க வேண்டும் என்றும், சரிபார்ப்பு செய்யாமல் எந்த அழைப்புகளையும் செய்திகளையும் நம்ப வேண்டாம் என்றும் கேட்டுக்கொண்டுள்ளது.
ஒவ்வொரு ஆண்டும் அக்டோபர் மாதம் தேசிய இணையப் பாதுகாப்பு விழிப்புணர்வு மாதமாக அனுசரிக்கப்படுவதாக பஞ்சாப் நேஷனல் வங்கி தெரிவித்துள்ளது. மோசடி செய்பவர்கள் இப்போது தங்கள் மோசடிகளை உண்மையானவை போல் தோற்றமளிக்கச் செய்யும் அதிநவீன நுட்பங்களைப் பயன்படுத்துகின்றனர் என்றும் அவ்வங்கி கூறியுள்ளது. இதுகுறித்து பஞ்சாப் நேஷனல் வங்கியின் நிர்வாக இயக்குநரும் தலைமைச் செயல் அதிகாரியுமான அசோக் சந்திரா கூறுகையில், “இன்றைய பல இணையவழி மோசடிகள் மக்களின் நடத்தை, குறிப்பாக நம்பிக்கை, பயம், அவசரம் மற்றும் அன்றாட டிஜிட்டல் பழக்கவழக்கங்களைச் சுரண்டுகின்றன. மோசடிக்காரர்கள் குடும்ப உறுப்பினர்கள், நண்பர்கள் அல்லது நம்பகமான நபர்களின் குரல் அல்லது முகத்தைப் போல நடித்து அவசரநிலை ஏற்பட்டதாகப் பொய்யாகக் கூறி, உங்களை ஏமாற்றி உடனடியாகப் பணத்தை அனுப்ப வைக்க முடியும்” என்று தெரிவித்துள்ளார்.
போலி மின்னஞ்சல்கள், குறுஞ்செய்திகள் அல்லது செய்திகள் மிகவும் தனிப்பட்டவையாகவும், உண்மையான வங்கிச் செய்திகள் போலவும் தோன்றலாம். இதனால் அவற்றை அடையாளம் காண்பது கடினமாகிறது. இதுபோன்ற செய்திகள் பீதியை ஏற்படுத்தி தகவல்களை முதலில் சரிபார்க்காமல் வாடிக்கையாளர்கள் செய்யக்கூடாத செயல்களைச் செய்யத் தூண்டலாம். நாடு முழுவதும் ஆன்லைன் மோசடி சம்பவங்கள் அதிகரித்து வருவதைக் கருத்தில் கொண்டு, மேம்பட்ட செயற்கை நுண்ணறிவால் ஏற்படும் அச்சுறுத்தல்கள், குவாண்டம் கணினி தொடர்பான அபாயங்கள் மற்றும் இந்திய ரிசர்வ் வங்கியின் கடுமையான ஒழுங்குமுறை வழிகாட்டுதல்களைச் சமாளிக்க, பொது மற்றும் தனியார் துறை வங்கிகள் தகவல் தொழில்நுட்பம் மற்றும் இணையப் பாதுகாப்பில் முதலீடுகளை அதிகரித்து வருகின்றன.
பஞ்சாப் நேஷனல் வங்கி தனது வாடிக்கையாளர்களின் கடினமாக உழைத்துச் சம்பாதித்த பணம் மற்றும் தனிப்பட்ட தகவல்களைப் பாதுகாக்க உறுதிபூண்டுள்ளதாகக் கூறியுள்ளது. ஆனலின் மோசடியைத் தடுக்க விழிப்புணர்வும் எச்சரிக்கையுமே மிகவும் பயனுள்ள நடவடிக்கைகள் என்று கூறியுள்ளது. வாடிக்கையாளர்களின் கடினமாக உழைத்துச் சம்பாதித்த பணம் மற்றும் தனிப்பட்ட தகவல்களைப் பாதுகாப்பதில் வங்கி உறுதியாக இருப்பதாக பஞ்சாப் நேஷனல் வங்கியின் தலைமைச் செயல் அதிகாரி அசோக் சந்திரா தெரிவித்துள்ளார்.