ரயில் பயணத்தின் போது ஏற்படும் எதிர்பாராத விபத்துகள் அக்குடும்பத்திற்கு பேரிழப்பாகத்தான் இருக்கும். இருப்பினும், ரயில் டிக்கெட் முன்பதிவு செய்யும்போதே பயணக் காப்பீட்டை தேர்ந்தெடுத்தால் நிதி உதவி கிடைக்கும். IRCTC விதிமுறைகளின்படி, பயணியின் மரணம் அல்லது நிரந்தர ஊனம் ஏற்படும் பட்சத்தில் கணிசமான காப்பீட்டுத் தொகை வழங்கப்படுகிறது. விபத்து நடந்தால் உரிய ஆவணங்களுடன் காப்பீட்டு நிறுவனத்திடம் கோரிக்கை வைக்க வேண்டும்.
மரணம் மற்றும் பல்வேறு விபத்துகளுக்கான காப்பீட்டுத் தொகையைப் பொறுத்தவரை, ஐ.ஆர்.சி.டி.சி பயணக் காப்பீட்டின் கீழ் மரணமடைந்தால் ரூ. 10 லட்சம் வரை காப்பீடு பெறலாம். எனினும், குடும்பத்தினருக்குக் கிடைக்கும் தொகை பாலிசி விதிமுறைகளைப் பொறுத்தே அமையும். அதன்படி, மரணம் மற்றும் முழுமையான நிரந்தர ஊனத்திற்கு ரூ. 10 லட்சமும், பகுதியான நிரந்தர ஊனத்திற்கு ரூ. 7.5 லட்சம் வரையிலும், காயம் காரணமாக மருத்துவமனையில் சிகிச்சை பெறுவதற்கான செலவுகளுக்கு ரூ. 2 லட்சம் வரையிலும், உடல் சொந்த ஊருக்கு எடுத்துச் செல்லப்படுவதற்கு ரூ. 10,000 வரையிலும் காப்பீட்டுப் பலன் பெற முடியும்.
ஆனால், அனைத்துப் பயணிகளுக்கும் அல்லது அனைத்து விபத்துகளுக்கும் முழுத் தொகையும் தானாகவே கிடைத்துவிடாது. தகுதி மற்றும் வழங்கப்படும் தொகை பாலிசி விதிமுறைகளின் மூலமே நிர்ணயிக்கப்படுகிறது. இந்தக் காப்பீட்டுத் தொகை பாலிசியில் குறிப்பிடப்பட்டுள்ள நாமினிக்கு மட்டுமே வழங்கப்படும். ஐ.ஆர்.சி.டி.சியின் வழக்கமான இ-டிக்கெட் முன்பதிவு விதிமுறைகளின்படி, நாமினி விவரங்களை வழங்கத் தவறினால் காப்பீட்டுத் தொகையைப் பெறுவதில் சிக்கல் ஏற்படலாம். அத்தகைய சூழல்களில் சம்பந்தப்பட்ட பாலிசி மற்றும் சட்டப்பூர்வ வாரிசுதாரர்களுக்கான விதிகளின்படி பணம் வழங்கப்படும்.
எனவே, டிக்கெட் முன்பதிவு செய்யும்போதே சரியான நாமினி விவரங்களை வழங்குவதுடன் காப்பீட்டு நிறுவனத்தின் பாலிசி ஆவணங்களையும் பாதுகாப்பாக வைத்திருக்க வேண்டும். காப்பீட்டுத் தொகையைப் பெற, விபத்துக்கான காரணத்தையும் உரிமை கோருபவர் இழப்பீட்டிற்குத் தகுதியுள்ளவரா என்பதையும் காப்பீட்டு நிறுவனம் சரிபார்க்க வேண்டும். ஐ.ஆர்.சி.டி.சி விதிமுறைகளின்படி, நாமினி அல்லது சட்டப்பூர்வ வாரிசுதாரரின் பூர்த்தி செய்யப்பட்ட கிளைம் படிவம், விபத்தை உறுதி செய்யும் ரயில்வே துறை அறிக்கை, விபத்தில் இறந்தவர்களின் விவரங்களைக் கொண்ட ரயில்வே அறிக்கை, நாமினியின் அடையாள அட்டை, மற்றும் பாலிசிக்கு ஏற்ப வங்கி கணக்கு விவரங்கள் மற்றும் ரத்து செய்யப்பட்ட காசோலை ஆகியவை தேவைப்படும்.
விபத்தின் சூழ்நிலையைப் பொறுத்து கூடுதல் ஆவணங்களும் கேட்கப்படலாம் என்பதால், காப்பீட்டு நிறுவனத்தைத் தொடர்பு கொண்டு முழுமையான ஆவணங்களின் பட்டியலைப் பெற்றுக்கொள்வது நல்லது. ரயில்வே துறையிடமிருந்து இழப்பீடு பெறுவது மற்றும் காப்பீட்டுத் தொகை பெறுவது இரண்டும் வெவ்வேறானவை. தகுதியான ரயில் விபத்துகள் மற்றும் அசம்பாவிதங்களில் மரணம் அல்லது காயம் ஏற்பட்டால், ரயில்வே சட்டம் 1989-ன் விதிகள் பொருந்தும் என்று ரயில்வே அமைச்சகம் தெளிவுபடுத்தியுள்ளது.
ரயில்வேயிடம் இருந்து இழப்பீடு பெறுவதற்கான தகுதியும் தொகையும் தனித்தனியாகவே தீர்மானிக்கப்படுகின்றன. எனவே, காப்பீட்டுத் தொகையைப் பெறுவது ரயில்வே துறையிடமிருந்து கூடுதல் இழப்பீடு கிடைப்பதற்கு உத்தரவாதம் அளிக்காது. விதிமுறைகளின்படி, பயணக் காப்பீடு என்பது பயனுக்கும் காப்பீட்டு நிறுவனத்திற்கும் இடையிலான ஒரு ஒப்பந்தமாகும். பாலிசியை வழங்குவதும், காப்பீட்டுத் தொகையை வழங்குவதும் காப்பீட்டு நிறுவனத்தின் பொறுப்பாகும்.
எனவே, விபத்து ஏற்பட்டால் குடும்பத்தினர் முதலில் பயணியின் காப்பீட்டு ஆவணங்களைச் சரிபார்க்க வேண்டும். அதில் காப்பீட்டு நிறுவனத்தின் பெயர் மற்றும் பாலிசி விவரங்கள் இருக்கும். அதன் பின்னர், அந்த நிறுவனத்தைத் தொடர்பு கொண்டு அதிகாரப்பூர்வ நடைமுறைகளின்படி கோரிக்கையைச் சமர்ப்பிக்கலாம்.