பிரதமர் நரேந்திர மோடி முகநூலில் பதிவிட்ட வீடியோ ஒன்று தற்காலிகமாக நீக்கப்பட்ட விவகாரத்தில் மெட்டா (Meta) நிறுவனத்தின் இந்திய பொதுக் கொள்கைக்கான உலகளாவிய தலைவருக்கு மத்திய அரசு சம்மன் அனுப்பியுள்ளது.
பிரதமர் நரேந்திர மோடி வெளியிட்ட வீடியோவை பேஸ்புக் தற்காலிகமாக நீக்கிய விவகாரத்தில், மெட்டா நிறுவனத்தின் (Meta) இந்திய பொதுக் கொள்கை (Public Policy) பிரிவு உயரதிகாரிகளை
மாணவர்களின் போராட்டங்கள் தீவிரமடைந்திருந்த சூழலில் பிரதமர் மோடியால் வெளியிடப்பட்ட இந்த வீடியோ, தவறுதலாக நீக்கப்பட்டுப் பின்னர் மீண்டும் மீட்கப்பட்டதாக மெட்டா நிறுவனம் விளக்கம் அளித்துள்ளது.
பிரதமர் மோடியின் உரையில் கூறியது என்ன?
வினாத்தாள் கசிவு விவகாரம் தொடர்பாக மாணவர்களுக்கு நம்பிக்கையளிக்கும் வகையில் பிரதமர் மோடி பதிவிட்ட வீடியோவில் பேசியதாவது:
“நண்பர்களே, வினாத்தாள் கசிவு என்பது ஒரு சிறிய விஷயம் அல்ல என்பதை நான் நன்கு அறிவேன். இது லட்சக்கணக்கான மாணவர்களுக்கும் அவர்தம் பெற்றோர்களுக்கும் மிகுந்த மனவேதனையை அளிக்கிறது. இந்தச் சம்பவங்களைத் தொடர்ந்து கடந்த இரண்டரை மாதங்களில் பல நடவடிக்கைகள் எடுக்கப்பட்டு, குற்றவாளிகள் கைது செய்யப்பட்டு தற்போது சிறையில் அடைக்கப்பட்டுள்ளனர்.
மேலும், வினாத்தாள் கசிவைத் தடுக்க விரைவு நீதிமன்றங்கள் (Fast-track courts) மற்றும் கடுமையான தண்டனைகளை உள்ளடக்கிய புதிய சட்ட வரைவு தயாரிக்கப்பட்டுள்ளது. அது அமைச்சரவைக் கூட்டத்தில் விவாதிக்கப்பட்டு நாடாளுமன்றக் கூட்டத்தொடரில் அவசர சட்டமாக நிறைவேற்றப்படும்” என்றும் உறுதியளித்திருந்தார்.
பிரதமர் மோடியின் வீடியோ முகநூலில் இருந்து திடீரென மறைந்த சம்பவம் சமூக வலைதளங்களில் பெரும் பரபரப்பை ஏற்படுத்தியது. இதன்பின்னர் விளக்கம் அளித்த மெட்டா நிறுவனத்தின் செய்தி தொடர்பாளர், “அந்த வீடியோ தவறுதலாக நீக்கப்பட்டுவிட்டது. உடனடியாக அது கண்டறியப்பட்டு மீண்டும் பக்கத்தில் மீட்கப்பட்டுவிட்டது” எனத் தெரிவித்துள்ளார்.
இருப்பினும், மின்னணு மற்றும் தகவல் தொழில்நுட்ப அமைச்சகம் (MeitY) இந்த விவகாரத்தை தீவிரமாக கருதி மெட்டாவின் உயர்மட்ட அதிகாரிகளிடம் விளக்கம் கேட்டுள்ளது.
சமீபகாலமாக இந்தியாவில் மெட்டா நிறுவனம் பல்வேறு விவகாரங்களில் மத்திய அரசின் தீவிர கண்காணிப்பில் இருந்து வருகிறது:
மாணவர் போராட்டங்களின் போது அரசுக்கு எதிராகப் பரப்பப்பட்ட சில சர்ச்சைக்குரிய புகைப்படங்கள் மற்றும் வீடியோக்களை நீக்க அரசு உத்தரவிட்டிருந்தது.
முன்னதாக, இன்ஸ்டாகிராமில் குழந்தைகள் மீதான பாலியல் துஷ்பிரயோக (CSAM) உள்ளடக்கங்கள் பரவியதாக குற்றச்சாட்டுகள் எழுந்தன. அதேபோல், மெட்டாவுக்கு சொந்தமான வாட்ஸ்அப் அறிமுகப்படுத்தத் திட்டமிட்டுள்ள “யூசர் நேம்” வசதிக்கும் மத்திய அரசு எதிர்ப்பு தெரிவித்துள்ளது.
இந்த புதிய வசதி போலி கணக்குகள், ஆள்மாறாட்ட மோசடிகள், இணைய மோசடி, “டிஜிட்டல் கைது” போன்ற மோசடிகளை அதிகரிக்கக் கூடும் என்பதால், அதனை உடனடியாக அமல்படுத்த வேண்டாம் என்று வாட்ஸ்அப்புக்கு மத்திய அரசு நோட்டீஸ் அனுப்பியுள்ளது. மேலும், இந்த வசதி அரசு அமைப்புகள், வங்கிகள் மற்றும் பொதுமக்களின் பெயர்களை ஒத்த பயனர் பெயர்களை பயன்படுத்தி ஏமாற்றும் செயல்களுக்கு வழிவகுக்கும் என்ற அச்சத்தையும் அரசு தெரிவித்துள்ளது.
இத்தகைய சூழலில் நாட்டின் பிரதமரின் வீடியோவே தற்காலிகமாக நீக்கப்பட்ட சம்பவம் மத்திய அரசுக்கும் மெட்டா நிறுவனத்திற்கும் இடையிலான மோதலை மேலும் அதிகரித்துள்ளது.