மனித வாழ்க்கையின் நிலையாமை குறித்துப் பிரசங்கம் செய்து முடித்த சில நிமிடங்களில், தேவாலயத்தில் இருந்த பிரம்மாண்ட மரச் சிலுவை தலையில் விழுந்து பாதிரியார் ஒருவர் சம்பவ இடத்திலேயே உயிரிழந்த கொடூர விபத்து ஈக்வடார் நாட்டில் பெரும் சோகத்தை ஏற்படுத்தியுள்ளது.
ஈக்வடாரில் அரங்கேறிய சோக சம்பவம்
ஈக்வடார் நாட்டின் கடலோர நகரான குவாயாகிலில் (Guayaquil) உள்ள புகழ்பெற்ற ‘அவர் லேடி ஆஃப் பர்பெச்சுவல் ஹெல்ப்’ கத்தோலிக்க தேவாலயத்தில் கடந்த சனிக்கிழமை மாலை வழக்கமான வார இறுதித் திருப்பலி வழிபாடுகள் நடைபெற்றுக் கொண்டிருந்தன. ‘காங்கிரிகேஷன் ஆஃப் தி மோஸ்ட் ஹோலி ரெடீமர்’ அமைப்பைச் சேர்ந்த 70 வயது மதிக்கத்தக்க பாதிரியார் பேட்ரிசியோ ஆல்ஃபிரெடோ சான்செஸ் மொலினாரி (Father Patricio Alfredo Sánchez Molinari) இந்த வழிபாட்டை முன்னின்று நடத்திக் கொண்டிருந்தார்.
உருக வைத்த கடைசிப் பிரசங்கம்
இந்தத் திருப்பலி வழிபாடானது தேவாலயத்தின் அதிகாரப்பூர்வ சமூக ஊடகப் பக்கங்களில் நேரலையாக (Livestream) ஒளிபரப்பப்பட்டு வந்தது. விபத்து நடப்பதற்குச் சற்று முன்பாக பாதிரியார் மொலினாரி மரணம் குறித்துப் பேசுகையில், “நாம் அனைவரும் ஒரு நாள் இறந்துதான் போவோம். மொபைல் போன்களிலும், தேவையற்ற உலக காரியங்களிலும் நேரத்தை வீணடிக்காமல், கடவுளுடனும் நமது குடும்பத்தினருடனும் அர்த்தமுள்ள நேரத்தைச் செலவிடுங்கள்” என்று மிக உருக்கமாகப் பிரசங்கித்தார். அவர் பிரசங்கத்தை முடித்துவிட்டு, பலிபீடத்தின் முன்னே நின்று அடுத்த கட்ட பிரார்த்தனையைத் தொடங்கி மக்களை ஆசீர்வதிக்க முற்பட்டபோது அந்தப் பயங்கரம் நிகழ்ந்தது.
கேமராவில் பதிந்த கொடூர விபத்து
பலிபீடத்திற்குப் பின்னால் இருந்த சுவரில் பிரம்மாண்டமாகப் பொருத்தப்பட்டிருந்த இயேசு நாதரின் மரச் சிலுவை, எதிர்பாராதவிதமாகத் திடீரென சுவரிலிருந்து கழன்று முன்னோக்கிச் சரிந்தது. பாதிரியார் மக்களை நோக்கித் திரும்பியிருந்ததால், பின்னால் சிலுவை சரிவதை அவரால் பார்க்க முடியவில்லை. கண் இமைக்கும் நேரத்தில் அந்த கனமான மரச் சிலுவை பாதிரியாரின் தலையின் பின்புறத்தில் பலமாகத் தாக்கியது. இதில் நிலைதடுமாறி அவர் பலிபீடத்தின் மீது சுருண்டு விழுந்தார்.
அலறிய மக்கள்
இதை நேரில் கண்ட தேவாலயத்தில் இருந்த நூற்றுக்கணக்கான மக்கள் அதிர்ச்சியில் அலறியடித்துக்கொண்டு பலிபீடத்தை நோக்கி ஓடினர். “பாதிரியாரே! … ஆம்புலன்ஸ் அழையுங்கள்!” என்று மக்கள் கதறும் சத்தங்கள் நேரலையிலேயே பதிவாகின. உடனடியாக அவசர மருத்துவக் குழுவினருக்குத் தகவல் கொடுக்கப்பட்டு அவர்கள் விரைந்து வந்தபோதிலும், தலையில் ஏற்பட்ட பலத்த காயம் காரணமாகப் பாதிரியார் சம்பவ இடத்திலேயே உயிரிழந்துவிட்டதாக மருத்துவர்கள் உறுதிப்படுத்தினர்.