வங்கக்கடலில் வலுவடைந்து வரும் ‘அர்னாப்’ புயல் காரணமாக, அரபிக்கடலில் நிலவிய குறைந்த காற்றழுத்த தாழ்வுப் பகுதி அதன் விருப்பத்திற்கு மாறாக, நாளைக்குள் வட தமிழகக் கடலோரப் பகுதியை நோக்கி இழுக்கப்பட வாய்ப்புள்ளது என தமிழ்நாடு வெதர்மேன் பிரதீப் ஜான் சமூக வலைதளப் பக்கத்தில் பதிவிட்டுள்ளார். இதன் விளைவாக, அரபிக்கடலில் இருந்து வங்கக்கடலை நோக்கி நகரும் இந்த காற்றழுத்த சுழற்சியால், தமிழகத்தில் தற்போது இறுதி கட்ட மழை பொழிவு தொடங்கியுள்ளது.
இந்த காற்றழுத்த சுழற்சியின் காரணமாக, கடலூர் முதல் சென்னை வரையிலான வட தமிழகப் பகுதிகளில் வட திசையில் இருந்து கிழக்குக் காற்றும், கன்னியாகுமரி, நெல்லை, தூத்துக்குடி, தேனி உள்ளிட்ட தென் தமிழக மாவட்டங்களில் மேற்திசைக் காற்றும் வீசக்கூடும்.
மழைக்கான ஹாட்ஸ்பாட் பகுதிகள்:
தமிழகத்தின் மத்திய உள் மாவட்டங்கள் மற்றும் கடலோர மாவட்டங்களான விழுப்புரம் முதல் நீலகிரி வரையிலான பகுதிகள் மீண்டும் கனமழைக்கான முக்கிய ‘ஹாட்ஸ்பாட்’ மண்டலமாக மாறுகின்றன. குறிப்பாக கள்ளக்குறிச்சி, தர்மபுரி, சேலம், திருப்பூர், கோயம்பத்தூர், நீலகிரி, ஈரோடு, நாமக்கல், திண்டுக்கல், கரூர், திருச்சி, மதுரை, புதுக்கோட்டை மற்றும் சிவகங்கை ஆகிய மாவட்டங்களில் அதிக கவனம் தேவைப்படுகிறது.
அதேபோல், காற்று ஒருங்கும் மண்டலத்தின் கீழ் அமைந்திருக்கும் டெல்டா மாவட்டங்கள் மற்றும் அதனை ஒட்டிய மாவட்டங்களான திருச்சி, தஞ்சாவூர், நாகப்பட்டினம், மயிலாடுதுறை, கும்பகோணம், அரியலூர், பெரம்பலூர், கடலூர், புதுச்சேரி, விழுப்புரம் மற்றும் திருவண்ணாமலை ஆகிய பகுதிகளிலும் கனமழைக்கு வாய்ப்புள்ளது.
தென் தமிழகம் மற்றும் மலைப் பகுதிகள்:
தென் தமிழகத்தைப் பொறுத்தவரை, மேற்திசைக் காற்றின் கூடுதல் உந்துதல் காரணமாக கன்னியாகுமரி, நெல்லை, தேனி மற்றும் தென்காசி மாவட்டங்களில் மழை பொழிவு அதிகரிக்கக்கூடும். அதேபோல, கிழக்குக் காற்று மலைகளில் மோதித் தடைபடுவதால் கொடைக்கானல் மற்றும் குன்னூர் மலைப்பகுதிகளில் மிகக் கனமழை பெய்ய வாய்ப்புள்ளது. எனவே, இந்த மலைப் பகுதிகளில் வசிக்கும் மக்கள் எச்சரிக்கையுடன் இருக்குமாறு அறிவுறுத்தப்படுகிறார்கள்.
சென்னை மற்றும் வட மாவட்டங்களின் நிலை:
வட பகுதியில், சென்னை (KTCC – காஞ்சிபுரம், திருவள்ளூர், செங்கல்பட்டு, சென்னை), ராணிப்பேட்டை மற்றும் வேலூர் ஆகிய மாவட்டங்கள், கடலில் இருந்து வீசும் காற்றினால் சுழற்சியின் வட பகுதியிலிருந்து ஈரப்பதத்தைப் பெறக்கூடும். மழைக்காலம் இடைவெளி எடுப்பதற்கு முன்பாக, சென்னை மற்றும் அதன் சுற்றுவட்டாரப் பகுதிகளுக்கு மழை கிடைப்பதற்கான கடைசி வாய்ப்பாக இன்றிலிருந்து நாளை காலை வரையிலான காலம் இருக்கும். தற்போதைய கணிப்பீட்டு மாதிரிகள் சென்னைக்கு அதிக மழையைக் காட்டவில்லை என்றாலும், கடந்த காலங்களில் இதுபோன்ற காற்று வீச்சு முறை சென்னைக்கு நல்ல மழையைக் கொடுத்துள்ளது. குறிப்பாக இரவிலிருந்து காலை வேளையிலோ அல்லது காலை நேரங்களிலோ உச்சக்கட்ட மழை பதிவாக வாய்ப்புள்ளது.
ஒட்டுமொத்தமாக, தமிழ்நாடு முழுவதும் மற்றொரு மிகப்பெரிய மழைப் பொழிவுக்கான நாள் காத்திருக்கிறது. இந்த மழைக்கு பிறகு தற்காலிகமாக மழைக்கு இடைவெளி கிடைக்கக்கூடும் என்பதால் மக்கள் தேவையான முன்னெச்சரிக்கை நடவடிக்கைகளை மேற்கொள்ளுமாறு கேட்டுக்கொள்ளப்படுகிறார்கள்.