தமிழ்நாட்டின் உள்நாட்டு தேவையைப் பூர்த்தி செய்யவும், சட்டவிரோதக் கனிமக் கடத்தலைத் தடுக்கவும் வெளிமாநிலங்களுக்கு ஜல்லி மற்றும் உடைக்கப்படாத கற்களைக் கொண்டு செல்வதற்கான தடையை மேலும் மூன்று மாதங்களுக்கு நீட்டித்து தமிழக அரசு அதிரடி உத்தரவைப் பிறப்பித்துள்ளது.
சுற்றுச்சூழல் பாதுகாப்பு மற்றும் கட்டுமானப் பொருட்களின் செயற்கைத் தட்டுப்பாட்டைத் தவிர்க்கும் நோக்கில், கடந்த ஜூலை 27-ம் தேதி விதிக்கப்பட்ட கனிம வளக் கடத்தல் தடைக்காலம் நிறைவடைந்த நிலையில், இந்த கெடுவை மேலும் 3 மாதங்களுக்கு நீட்டித்துப் புவியியல் மற்றும் சுரங்கத்துறை உத்தரவிட்டுள்ளது. கேரள எல்லைப் பகுதி உட்பட அண்டை மாநில எல்லை மாவட்டங்களான கன்னியாகுமரி, தென்காசி, தேனி, கோவை, திருப்பூர் மற்றும் கிருஷ்ணகிரி ஆகியவற்றின் ஆட்சியர்களும் மாவட்டக் காவல் கண்காணிப்பாளர்களும் இதைத் தீவிரமாகக் கண்காணிக்கப் பணிக்கப்பட்டுள்ளனர்.
புதுச்சேரி மற்றும் காரைக்கால் தவிர மற்ற வெளிமாநிலங்களுக்குக் கட்டுமானப் பணிகளுக்குப் பயன்படும் ஜல்லி மற்றும் உடைக்கப்படாத கற்களைக் (rough stone) கொண்டு செல்ல விதிக்கப்பட்ட தடையைத் மேலும் 3 மாதங்களுக்குத் தமிழ்நாடு அரசு நீட்டித்துள்ளது. ஜூலை 27-ஆம் தேதி விதிக்கப்பட்ட 3 மாத தடைக்காலம் முடிவடைந்ததைத் தொடர்ந்து, இந்த புதிய நீட்டிப்பு உத்தரவு அமலுக்கு வருகிறது.
முந்தைய தடையின் நோக்கங்கள் முழுமையாக நிறைவேறாததால் இந்த நீட்டிப்பு செய்யப்படுவதாகப் புவியியல் மற்றும் சுரங்கத்துறை இயக்குனர் தெரிவித்துள்ளார். தமிழ்நாட்டிற்குள் கனிமங்களின் விநியோகம் தடையின்றி கிடைப்பதை உறுதி செய்யவும், சுற்றுச்சூழல் மற்றும் சூழலியலைப் பாதுகாக்கவும், சட்டவிரோதச் சுரங்கம் மற்றும் போக்குவரத்தைத் தடுக்கவும் இந்த நடவடிக்கை எடுக்கப்பட்டுள்ளது. இதுகுறித்துத் மூத்த அதிகாரி ஒருவர் டைம்ஸ் ஆஃப் இந்தியாவிடம் கூறுகையில், “அண்டை மாநிலங்களில் உடைக்கப்படாத கற்கள் அரிய கனிமம் அல்ல. மேலும், இவற்றை எல்லையோர மாவட்டங்கள் வழியாகக் கொண்டு செல்வது சட்டம்-ஒழுங்கு பிரச்சினைகளை ஏற்படுத்துகிறது. எனவே, உயர்மட்ட அளவில் இந்த முடிவு எடுக்கப்பட்டுள்ளது” என்று கூறியுள்ளார்.
மேலும், தமிழக அரசின் இந்த உத்தரவை மீறுபவர்கள் மீது கடுமையான நடவடிக்கை எடுக்கப்படும். எல்லை மாவட்ட ஆட்சியர்கள் மற்றும் காவல் கண்காணிப்பாளர்கள் தீவிரமாகக் கண்காணித்து உத்தரவை உறுதியாக நடைமுறைப்படுத்த அறிவுறுத்தப்பட்டுள்ளனர்.
கன்னியாகுமரி, தென்காசி, தேனி, கோவை, திருப்பூர் மற்றும் கிருஷ்ணகிரி ஆகிய சுற்றுச்சூழல் ரீதியாகப் உணர்திறன் மிக்க மேற்கு தொடர்ச்சி மலைப் பகுதிகளில் தான் இக்கற்கள் அதிக அளவில் வெட்டி எடுக்கப்படுகின்றன. மாநிலத்தின் உள்நாட்டுத் தேவையைப் பூர்த்தி செய்யவே இங்குள்ள உற்பத்திகள் போதுமானதாக இல்லை என்றும், வெளிமாநிலங்களுக்கு அதிக அளவில் கொண்டு செல்வதால் செயற்கையான தட்டுப்பாடு ஏற்பட்டு கட்டுமானப் பொருட்களின் விலை உயர்ந்து வருவதுடன், எல்லை மாவட்டங்களில் சட்டவிரோத குவாரி பணிகளுக்கும் இது வழிவகுப்பதாக அரசு சுட்டிக்காட்டியுள்ளது.