3 பச்சிளம் குழந்தைகளை கழுத்தை நெரித்துக் கொன்றதாக குற்றம்சாட்டப்பட்ட லின்ட்ஸே கிளான்சி (36) என்ற தாயின் வழக்கில், ஒருமித்த முடிவை எட்ட முடியாததால், இதனை ‘முடிவுக்கு வர இயலாத வழக்கு’ என்று நீதிபதி அறிவித்துள்ளார்.
கடந்த 2023 ஜனவரி 24 அன்று, அமெரிக்காவின் மாசசூசெட்ஸின் டக்ஸ்பரி நகரில் உள்ள தனது வீட்டில் ஐந்து வயது கோரா, மூன்று வயது டாசன் மற்றும் எட்டு மாதக் குழந்தை கேலன் ஆகிய மூன்று குழந்தைகளையும் லின்ட்ஸே கிளான்சி கழுத்தை நெரித்துக் கொன்றார். பின்னர் அவர் வீட்டின் இரண்டாவது மாடி ஜன்னலில் இருந்து கீழே குதித்து தற்கொலைக்கு முயன்றதில், அவரது முதுகுத்தண்டு சேதமடைந்து சக்கர நாற்காலியில் முடங்கினார்.
குழந்தைகளை கொன்றதை அவர் ஒப்புக்கொண்ட போதிலும், பிரசவத்திற்குப் பிந்தைய தீவிர மனநலப் பாதிப்பான ‘போஸ்ட்பார்டம் சைக்கோசிஸ்’ (Postpartum psychosis) காரணமாகவே மாயத்தோற்றங்களால் இந்த விபரீதம் நிகழ்ந்தது என்றும், அவரை சட்டப்படி குற்றவாளியாக கருத முடியாது என்றும் அவரது வழக்கறிஞர்கள் வாதிட்டனர். ஆனால், கணவரை வெளியே அனுப்பிவிட்டு திட்டமிட்டே இக்கொலைகளை அவர் அரங்கேற்றினார் என அரசு தரப்பு கடுமையான வாதங்களை முன்வைத்தது.
அமெரிக்க சட்ட விதிகளின்படி ஒருவரை குற்றவாளி என தீர்மானிக்க நடுவர் குழுவில் உள்ள அனைவரும் ‘நியாயமான சந்தேகத்திற்கு அப்பாற்பட்டு’ ஒருமனதாக முடிவெடுக்க வேண்டும். ஒன்பது பெண்கள் மற்றும் மூன்று ஆண்கள் அடங்கிய நடுவர் குழுவினர் பல நாட்கள் தீவிர ஆலோசனை நடத்தியும் ஒருமித்த தீர்ப்புக்கு வர இயலவில்லை என நீதிபதியிடம் மூன்று முறை தெரிவித்தனர். இறுதி முயற்சியாக நீதிபதி வில்லியம் சல்லிவன் கூடுதல் வழிகாட்டுதல்களை வழங்கியும் நடுவர் குழுவில் உடன்பாடு ஏற்படாததால், இவ்வழக்கு முடிவுக்கு வர இயலாத வழக்கு என அறிவிக்கப்பட்டது.
இந்த அறிவிப்பினால் லின்ட்ஸே கிளான்சி நிரபராதி என்று நிரூபிக்கப்பட்டதாகவோ அல்லது உடனடியாக விடுதலை செய்யப்படுவார் என்றோ அர்த்தமல்ல. அவர் மீதான கொலை குற்றச்சாட்டுகள் தொடர்ந்து நீடிக்கும் நிலையில், தற்போது அவர் அனுமதிக்கப்பட்டுள்ள மனநல சிகிச்சை நிலையத்திலேயே தொடர்ந்து கண்காணிக்கப்படுவார். உலகளவில் பெரும் அதிர்வலைகளை ஏற்படுத்திய மிக தீவிரமான வழக்கு என்பதால், புதிய நடுவர் குழுவை அமைத்து அரசு தரப்பு மறுவிசாரணை கோருவதற்கோ அல்லது குற்றத்தை ஒப்புக்கொள்ளும் சமரச ஒப்பந்தத்தை முன்னெடுப்பதற்கோ அதிக வாய்ப்புள்ளதாக சட்ட வல்லுநர்கள் தெரிவிக்கின்றனர்.
இனி விசில் சின்னம் நிரந்தரம்..!! தவெக அங்கீகரிக்கப்பட்ட அரசியல் கட்சியாக அறிவிப்பு..!! இந்திய தேர்தல் ஆணையம் அதிரடி..!!