“ஜனநாயகன்” ரிலீஸை மாஸாக கொண்டாடிய ஆட்டோ அண்ணா… பட்டாசு இல்லை, போர்வை தான்!

July 23, 2026 ietamil சினிமா 0

கோவையைச் சேர்ந்த ஆட்டோ ஓட்டுநரும், தமிழக வெற்றிக் கழகத்தின் கோவை புறநகர் கிழக்கு மாவட்ட செயலாளருமான பாபு, தமிழக முதல்வரும் நடிகருமான ஜோசப் விஜய் நடித்துள்ள ‘ஜனநாயகன்’ திரைப்படத்தின் வெளியீட்டை வித்தியாசமான முறையில் கொண்டாடி பொதுமக்களின் பாராட்டைப் பெற்றுள்ளார். வழக்கமாக திரைப்பட வெளியீட்டு நாளில் ரசிகர்கள் பட்டாசு வெடித்தும், ஆட்டம்-பாட்டத்துடனும் கொண்டாடும் நிலையில், சமூக அக்கறையை வெளிப்படுத்தும் வகையில் ஆதரவற்ற முதியோருக்கு போர்வைகள் வழங்கி மனிதநேயமான செயலில் ஈடுபட்டுள்ளார்.

நீண்ட காலமாக நடிகர் விஜய்யின் தீவிர ரசிகராக இருந்து வந்த பாபு, விஜய் மக்கள் இயக்கத்தில் பல்வேறு சமூகப் பணிகளில் தீவிரமாக செயல்பட்டு வந்தவர். தற்போது தமிழக வெற்றிக் கழகத்தின் கோவை புறநகர் கிழக்கு மாவட்ட செயலாளராக பொறுப்பு வகித்து வருகிறார். நடிகராக விஜய் இருந்த காலத்திலிருந்தே, அவரது ஒவ்வொரு திரைப்படமும் வெளியாகும் போதும் கொண்டாட்டங்களை வெறும் ஆரவார நிகழ்வாக மட்டுமின்றி, சமூக நலப் பணிகளுடன் இணைத்து நடத்துவதை தனது வழக்கமாகக் கொண்டுள்ளார். ஏழை, எளிய மக்களுக்கு உணவு வழங்குதல், கல்வி உதவிகள், மருத்துவ உதவிகள், முதியோருக்கு தேவையான பொருட்கள் வழங்குதல் உள்ளிட்ட பல்வேறு சேவை நடவடிக்கைகளிலும் தொடர்ந்து ஈடுபட்டு வருவதாக கூறப்படுகிறது.

அந்த வகையில், ‘ஜனநாயகன்’ திரைப்படம் வெளியானதை முன்னிட்டு, தனது ஆட்டோவில் புதிய போர்வைகளை ஏற்றிக்கொண்டு கோவை மாநகரின் பல்வேறு பகுதிகளில் உள்ள சாலையோரங்கள், பேருந்து நிலையங்கள் மற்றும் நடைபாதைகளில் தங்கியிருக்கும் ஆதரவற்ற முதியோர்களை நேரில் சந்தித்தார். அவர்களிடம் நலம் விசாரித்து, குளிரில் பாதுகாப்பாக இருக்க போர்வைகளை வழங்கியதுடன், அவர்களுடன் சில நிமிடங்கள் உரையாடியும் ஆறுதல் கூறினார். எதிர்பாராத இந்த உதவியால் முதியோர்கள் மகிழ்ச்சியும் நெகிழ்ச்சியும் அடைந்தனர்.

பட்டாசு வெடிப்பதற்கும், கட்-அவுட்களுக்கு பால் அபிஷேகம் செய்வதற்கும், ஆடம்பர கொண்டாட்டங்களுக்கும் செலவிடப்படும் தொகையை சமூக நலப் பணிகளுக்கு பயன்படுத்த வேண்டும் என்ற எண்ணத்தில்தான் இந்த முயற்சியை மேற்கொண்டதாக பாபு தெரிவித்துள்ளார். ரசிகர்களின் கொண்டாட்டம் சமூகத்திற்கு பயனுள்ளதாக இருக்க வேண்டும் என்பதே தனது விருப்பம் என்றும், எதிர்காலத்திலும் திரைப்பட வெளியீடுகள் மட்டுமின்றி முக்கிய நாட்களிலும் இதுபோன்ற மனிதநேய சேவைகளை தொடர்ந்து மேற்கொள்ள உள்ளதாகவும் அவர் கூறியுள்ளார்.

திரைப்பட வெளியீட்டு கொண்டாட்டத்தை சமூகப் பொறுப்புடன் இணைத்து, ஆதரவற்றோரின் வாழ்க்கையில் சிறு மகிழ்ச்சியை ஏற்படுத்திய பாபுவின் இந்த மனிதநேய செயல், பொதுமக்கள் மற்றும் விஜய் ரசிகர்கள் மத்தியில் பாராட்டைப் பெற்று வருகிறது. சமூக நலன் சார்ந்த இதுபோன்ற முயற்சிகள் மற்ற ரசிகர் மன்றங்களுக்கும் முன்னுதாரணமாக அமையும் என பலரும் கருத்து தெரிவித்து வருகின்றனர்.



Source link