‘ஜென் ஜி’ தலைமுறையினர் பிறரைப் பார்த்துப் பின்பற்றுபவர்கள் மற்றும் உணர்ச்சிவசப்படுபவர்கள் என்றும், அவர்கள் சாந்தமான மனதுடன் சிந்திப்பதில்லை என்றும் ஆர்.எஸ்.எஸ் தலைவர் மோகன் பகவத் ஞாயிற்றுக்கிழமை கூறியதாக ‘பி.டி.ஐ’ செய்தி நிறுவனம் செய்தி வெளியிட்டுள்ளது.
‘தற்கால தாய்மை’ குறித்த நிகழ்வில் பேசிய பகவத், புதிய தலைமுறையின் வாழ்க்கை முறை குறித்த பெற்றோரின் கவலைகள் குறித்து உரையாற்றினார். மேலும், அடுத்த தலைமுறையினரிடம் எதை எதிர்பார்க்கிறோமோ, அதை மூத்தவர்கள் முதலில் தங்கள் வாழ்க்கையில் கடைப்பிடித்துக் காட்ட வேண்டும் என்றார்.
“சமூகத்தில் நீங்கள் என்ன மாற்றத்தைக் காண விரும்புகிறீர்களோ, அதாகவே நீங்கள் மாறுங்கள். சமூக ஊடகங்களில் செலவிடும் நேரத்தைக் குறைத்துக் கொள்ளுங்கள். மொபைல் பயன்பாட்டில் சுயகட்டுப்பாட்டைப் பின்பற்றுங்கள். நாம் அரசாங்கத்தை எதிர்நோக்குகிறோம். ஆனால், நமது பாரம்பரியத்தில் அரசாங்கம் இரண்டாவதுதான், சமூகமே முதன்மையானது. அரசாங்கம் இந்தச் சட்டத்தையோ அல்லது அந்தச் சட்டத்தையோ கொண்டு வர வேண்டும் என்று நாம் சொல்கிறோம்… ஆனால் அதை நாம் நம் வீட்டிலேயே செய்ய முடியும்” என்று மோகன் பகவத் கூறியதாக பி.டி.ஐ செய்தி மேற்கோளிட்டுள்ளது.
நீட் தேர்வு வினாத்தாள் கசிவு விவகாரம் தொடர்பாக ‘ஜென் ஜி’ தலைமுறையினர் தலைமையில் ஒரு மாதத்திற்கும் மேலாக நடந்த போராட்டம், மத்திய கல்வி அமைச்சர் தர்மேந்திர பிரதானின் ராஜினாமாவில் முடிந்த ஒரு நாளுக்குப் பிறகு அவரது இந்த கருத்துக்கள் வந்துள்ளன.
பெற்றோர்கள் மொபைல் போன் பயன்பாட்டில் சுயகட்டுப்பாட்டைப் பயிற்சி செய்வதை தான் ஆதரிப்பதாகக் கூறிய பகவத், குழந்தைகளின் கேள்விகளுக்குத் தீர்வுகாண குடும்ப உறுப்பினர்களிடையே கலந்துரையாடல் இருப்பது அவசியம் என வலியுறுத்தினார். “நாம் குழந்தைகளிடம் மொபைல் சுயகட்டுப்பாட்டைப் பற்றிப் பேசுகிறோம், ஆனால் நாமே மொபைலுடன் இணைந்திருக்கிறோம். எந்தளவுக்கு என்றால், குழந்தை அழுதால் தாய் கைபேசியைக் கொடுக்கிறார்,” என்று அவர் கூறியதாக பி.டி.ஐ குறிப்பிட்டுள்ளது.
திருமணம் மற்றும் ‘லிவ்-இன்’ (Live-in) உறவுகளுக்கு இடையிலான வேறுபாடு குறித்துப் பேசிய அவர்: “திருமணம் என்பது அறத்தை (தர்மத்தை) புகுத்தும் ஒரு ஒழுக்கம். அதன் மாற்று வடிவமே ‘லிவ்-இன்’ உறவு. நவீனத்துவம். இதன் விளைவுகள் என்ன? நமக்குப் பொறுப்புகள் தேவையில்லை, மகிழ்ச்சி மட்டுமே வேண்டும். தேவைப்படும்போது ஒன்றாக வாழ்வது, தேவைப்படாதபோது பிரிந்து செல்வது. பொறுப்புகள் ஏதும் இல்லை. இதனால் என்ன வளரும்? உலகம் முழுவதிலும் சுற்றிலும் பாருங்கள், என்ன வளர்ந்து கொண்டிருக்கிறது என்பது தெரியும்.”
இருப்பினும், நவீனத்துவமும் வரவேற்கத்தக்கதே என்றும், காலத்திற்கு ஏற்ப மாறுவது நாட்டின் பாரம்பரியத்தின் ஒரு பகுதி என்றும் அவர் குறிப்பிட்டார்.
எல்.ஜி.பி.டி.கியூ (LGBTQ) பிரிவினரும் நமது சமூகத்தின் ஒரு பகுதி என்றும், அவர்களை இழிவாகப் பார்க்கக் கூடாது என்றும் அவர் கூறினார்.
மேலும், கடந்த காலத்தில் இருந்த அனைத்தும் மதிப்பற்றவை என்று ஆங்கிலேயர்கள் நம் நாட்டை நம்ப வைத்ததாக அவர் கூறினார். இந்தியா ஏற்றுக்கொண்ட பல விஷயங்களில் உள்ள முழுமையற்ற பார்வையால் மேலைநாடுகள் பல பிரச்னைகளை எதிர்கொண்டு வருவதாகவும் அவர் தெரிவித்தார்.