தமிழகத்தில் இயங்கி வரும் திட்டமிடப்பட்ட விமான சேவை நிறுவனங்களுக்கு ஊக்கமளிக்கும் வகையில், விமான எரிபொருள் மீதான மதிப்புக் கூட்டு வரியை பெருமளவில் குறைத்து தமிழ்நாடு அரசு அதிரடி உத்தரவிட்டுள்ளது. இது தொடர்பாக வணிகவரி மற்றும் பதிவுத்துறை சார்பில் அக்டோபர் 23 அன்று அதிகாரப்பூர்வ அரசாணை வெளியிடப்பட்டுள்ளது.
இந்த புதிய அறிவிப்பின்படி, சென்னை சர்வதேச விமான நிலையத்தில் சேவைகளை வழங்கும் திட்டமிடப்பட்ட விமானங்களுக்கு விற்பனை செய்யப்படும் எரிபொருளுக்கான வரி, இதுவரை வசூலிக்கப்பட்டு வந்த 29 சதவீதத்திலிருந்து 16 சதவீதமாகக் குறைக்கப்பட்டுள்ளது. மேலும், சென்னை தவிர்ந்த மாநிலத்தின் பிற பகுதிகளிலுள்ள விமான நிலையங்களில் இயக்கப்படும் திட்டமிடப்பட்ட விமானங்களுக்கான எரிபொருள் வரி 29 சதவீதத்திலிருந்து அதிரடியாக 1 சதவீதமாகக் குறைக்கப்பட்டுள்ளது.
அத்துடன், அதிகபட்சமாகப் புறப்படும் எடை 40,000 கிலோகிராமுக்கும் குறைவாகக் கொண்ட சிறிய வகை திட்டமிடப்பட்ட விமானங்களுக்கான எரிபொருள் வரி, பிற விமான நிலையங்களில் 5 சதவீதத்திலிருந்து 1 சதவீதமாகக் குறைக்கப்பட்டு சலுகை அளிக்கப்பட்டுள்ளது.
இப்பயனுள்ள வரிக் குறைப்பு நடவடிக்கையானது 2026-ஆம் ஆண்டு நவம்பர் மாதம் 1-ஆம் தேதி முதல் அமலுக்கு வருகிறது. இந்தச் சலுகை 2027-ஆம் ஆண்டு அக்டோபர் 31-ஆம் தேதி வரை ஒரு வருட காலத்திற்கு நடைமுறையில் இருக்கும் எனத் தெரிவிக்கப்பட்டுள்ளது. இந்த வரிவிலக்கு மற்றும் சலுகைகளைப் பெற விரும்பும் விமான சேவை நிறுவனங்கள், அதற்கான உரிய படிவத்தைப் பூர்த்தி செய்து, தங்கள் மாதாந்திர வரிக் கணக்குத் தாக்கலின் போது சமர்ப்பிக்க வேண்டும் என்றும் அரசு அறிவுறுத்தியுள்ளது.