சென்னை: தமிழ்நாட்டில் விமான எரி பொருள் மீதான வாட் வரியை தமிழக அரசு கணிசமாக குறைத்துள்ள நிலையில், இண்டிகோ விமான நிறுவனம், தமிழக அரசுக்கும், முதல்வர் விஜய்க்கும் நன்றி தெரிவித்துள்ளது.
விமான எரிபொருள் வரி குறைப்பை அறிவித்துள்ளது தமிழக அரசு. தமிழ்நாடு அரசின் வணிகவரித் துறை சார்பில் வெளியிடப்பட்ட அரசிதழ் அறிவிக்கையில், தமிழ்நாடு மதிப்புக் கூட்டு வரிச் சட்டத்தின்படி விமான எரிபொருள் மீதான மதிப்புக்கூட்டு வரி (VAT) தற்போது குறைக்கப்பட்டுள்ளது.
அதன்படி, சென்னை விமான நிலையத்தில் திட்டமிடப்பட்ட விமான சேவை நிறுவனங்களுக்கு எண்ணெய் நிறுவனங்கள் விற்பனை செய்யும் எரிபொருள் (ஜெட் எரிபொருள் உட்பட) மீதான வரி 29 சதவீதத்தில் இருந்து 16 சதவீதமாகக் குறைக்கப்பட்டுள்ளது.
சென்னையைத் தவிர, மாநிலத்தில் உள்ள பிற விமான நிலையங்களில் விமானங்களுக்கு நிரப்பப்படும் எரிபொருள் வரி 29 சதவீதத்தில் இருந்து 1 சதவீதமாக குறைக்கப்பட்டுள்ளது.
இந்த வரிக் குறைப்பு 2026 நவம்பர் 1 முதல் 2027 அக்.31 ஆம் தேதி வரை ஓராண்டு நடைமுறையில் இருக்கும். வரிச் சலுகையைப் பெற, எரிபொருள் விற்பனை செய்யும் நிறுவனம், அதை வாங்கும் விமான நிறுவனம் பூர்த்தி செய்து கையொப்பமிட்ட உறுதிமொழி படிவத்தை தங்கள் மாதாந்திர வரிக் கணக்குடன் சம்பந்தப்பட்ட மதிப்பீட்டு அலுவலரிடம் சமர்ப்பிக்க வேண்டும்.
இந்த படிவம் ஒவ்வொரு மாதமும் அளிக்கப்பட வேண்டும். வாங்கப்பட்ட எரிபொருள் உள்நாட்டு விமானப் பயன்பாட்டுக்கானது என்பதையும் அதில் விமான நிறுவனம் உறுதிசெய்ய வேண்டும் எனத் தெரிவிக்கப்பட்டுள்ளது.
எரிபொருள் மீதான மதிப்புக்கூட்டு வரியை குறைக்கும் தமிழக அரசின் முடிவை வரவேற்பதாக இண்டிகோ விமான நிறுவனம் தெரிவித்துள்ளது. மேலும் முதலமைச்சர் ஜோசப் விஜய்க்கு அந்நிறுவனம் நன்றி தெரிவித்துள்ளது.
இண்டிகோ விமான சேவை நிறுவனம் எக்ஸ் வலைதளத்தில் வெளியிட்டுள்ள பதிவில், “விமான டர்பைன் எரிபொருள் (ATI) மீதான மதிப்புக்கூட்டு வரியைக் (VAT) குறைக்கும் தமிழக அரசின் முடிவை நாங்கள் வரவேற்கிறோம். மேலும், இந்த முற்போக்கான முயற்சிக்கு முதலமைச்சர், ஜோசப் விஜய்க்கு எங்களது மனமார்ந்த பாராட்டுகளை தெரிவித்துக் கொள்கிறோம்.
இத்தகைய நடவடிக்கைகள் விமானப் போக்குவரத்தை வலுப்படுத்துவதோடு, மாநிலத்தின் சுற்றுலா மற்றும் பொருளாதார வளர்ச்சிக்கு ஆதரவளித்து, இந்தியாவில் மேலும் வலுவான விமானப் போக்குவரத்துச் சூழலை உருவாக்கப் பங்களிக்கின்றன. இதுபோன்ற முற்போக்கான முயற்சிகள் விமானப் பயணத்தை மேலும் எளிதில் அணுகக்கூடியதாக மாற்றும் என நம்புகிறோம்.” எனத் தெரிவிக்கப்பட்டுள்ளது.