நான்காவது சுற்றில் ரிபாகினா: யு.எஸ்., ஓபனில் முன்னேற்றம்

அமெரிக்காவின் நியூயார்க் நகரில், யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது. பெண்கள் ஒற்றையர் பிரிவு 3வது சுற்றில், கஜகஸ்தானின் எலினா ரிபாகினா, உக்ரைனின் யுலியா ஸ்டாரோடுப்ட்சேவா மோதினர். இதில் ரிபாகினா 7-6, 6-3 என்ற நேர் செட் கணக்கில் வெற்றி பெற்றார்.

மற்றொரு 3வது சுற்றில் போலந்தின் இகா ஸ்வியாடெக் 7-6, 7-6 என, செக்குடியரசின் மேரி பவுஸ்கோவாவை வீழ்த்தினார். அமெரிக்காவின் கோகோ காப் 6-3, 6-4 என, ஸ்பெயினின் கிறிஸ்டினா புக்சாவை தோற்கடித்தார். ஜப்பானின் நவோமி ஒசாகா 6-3, 3-6, 7-5 என, பெல்ஜியத்தின் எலிஸ் மெர்டென்சை வென்றார்.

மற்ற 3வது சுற்று போட்டிகளில் அமெரிக்காவின் மடிசன் கீஸ், அமண்டா அனிசிமோவா, பிலிப்பைன்சின் அலெக்சாண்ட்ரா ஏலா அதிர்ச்சி தோல்வியடைந்தனர்.

ஸ்வெரேவ் வெற்றி: ஆண்கள் ஒற்றையர் பிரிவு 3வது சுற்றில் ஜெர்மனியின் அலெக்சாண்டர் ஸ்வெரேவ், சிலியின் அலெஜான்டிரோ டபிலோ மோதினர். ஸ்வெரேவ் 6-2, 7-6, 6-2 என்ற நேர் செட் கணக்கில் வெற்றி பெற்றார்.

இந்திய ஜோடி தோல்வி

ஆண்கள் இரட்டையர் பிரிவு முதல் சுற்றில் இந்தியாவின் யூகி பாம்ப்ரி, நியூசிலாந்தின் மைக்கேல் வீனஸ் ஜோடி 6-7, 6-7 என, அமெரிக்காவின் ரியான், பாட்ரிக் ஜோடியிடம் தோல்வியடைந்தது.

* மற்றொரு முதல் சுற்றில் இந்தியாவின் அனிருத் சந்திரசேகர், பெலாரசின் இவான் லியுடாரெவிச் ஜோடி 4-6, 7-5, 4-6 என, பிரிட்டனின் ஆர்தர் பெரி, ஜோஷுவா பாரிஸ் ஜோடியிடம் வீழ்ந்தது.