எழுதியவர்:மௌல்ஸ்ரீ சேத்
அயோத்தியில் உள்ள ராமர் கோயிலின் முதல் தலைமைச் செயல் அதிகாரியாக (CEO) ஓய்வுபெற்ற விமானப்படை ஏர் மார்ஷல் ஜிதேந்திர மிஸ்ராவை நியமித்ததுடன், ஸ்ரீ ராம ஜென்மபூமி தீர்த்த க்ஷேத்ரா அறக்கட்டளை புதன்கிழமை (செப்டம்பர் 2 ) மூன்று புதிய அறங்காவலர்களை நியமித்தது. அவர்களில் ஒருவர், அறக்கட்டளையின் முதல் பெண் உறுப்பினர் ஆவார்.
இந்த செய்தியை ஆங்கிலத்தில் படிக்க இங்கே க்ளிக் செய்யவும்:
டாக்டர் நிர்மலா யாதவ், வழக்கறிஞர் மதன் மோகன் பாண்டே மற்றும் தொழிலதிபரும் சமூக சேவகருமான மகேஷ் பக்சந்த்கா ஆகியோரின் நியமனம், சமூகத்தின் பல்வேறு தரப்பினருக்கு பிரதிநிதித்துவம் அளிப்பதைக் குறிப்பிடுவதுடன், குறிப்பாக ஓபிசி பிரிவைச் சேர்ந்த பெண் ஒருவர் அறக்கட்டளையில் இடம்பெற்றிருப்பது குறிப்பிடத்தக்கதாகும். மேலும், நன்கொடை திருட்டு சர்ச்சைக்குப் பிறகு அறக்கட்டளையின் செயல்பாட்டு பரப்பையும், அதன் மீதான மக்களின் நம்பிக்கையையும் விரிவுபடுத்தும் நோக்கில், பல்வேறு தொழில்கள் மற்றும் அனுபவப் பின்னணியைச் சேர்ந்தவர்கள் அறக்கட்டளையில் இணைக்கப்பட்டுள்ளனர்.
கடந்த ஆண்டு பிம்லேந்திர மோகன் மிஸ்ரா மறைந்ததைத் தொடர்ந்து ஏற்பட்ட காலியிடங்களும், நன்கொடை திருட்டு சர்ச்சையைத் தொடர்ந்து முன்னாள் பொதுச் செயலாளர் சம்பத் ராய் மற்றும் உறுப்பினர் அனில் மிஸ்ரா ஆகியோர் பதவி விலகியதால் ஏற்பட்ட காலியிடங்களும் இந்த மூன்று புதிய நியமனங்கள் மூலம் நிரப்பப்பட்டுள்ளன.
அறக்கட்டளையின் மூன்று புதிய உறுப்பினர்கள்
டாக்டர் நிர்மலா யாதவ்
உத்தரப் பிரதேச மாநிலம் ஷிகோஹாபாத்தைச் சேர்ந்த ஓய்வுபெற்ற கல்லூரி முதல்வரான நிர்மலா யாதவ், ஸ்ரீ ராம ஜென்மபூமி தீர்த்த க்ஷேத்ரா அறக்கட்டளையின் முதல் பெண் உறுப்பினர் ஆவார். இந்தி மற்றும் சமஸ்கிருதத்தில் முதுகலைப் பட்டமும், முனைவர் பட்டமும் பெற்றுள்ள 66 வயதான நிர்மலா யாதவ், 19 ஆண்டுகள் கல்லூரி முதல்வராகவும், 15 ஆண்டுகள் பல்கலைக்கழக நிர்வாகக் குழு உறுப்பினராகவும் பணியாற்றியுள்ளார். இதன் மூலம் கல்வி மற்றும் நிறுவன நிர்வாகத்தில் அவருக்கு குறிப்பிடத்தக்க அனுபவம் உள்ளது.
மதன் மோகன் பாண்டே
74 வயதான மதன் மோகன் பாண்டே அறக்கட்டளையில் உறுப்பினராக இணைக்கப்பட்டிருப்பது, வேறுபட்ட வகையான நிறுவன அனுபவத்தை அறக்கட்டளைக்கு வழங்குகிறது. சட்டப் பட்டதாரியும் வழக்கறிஞருமான பாண்டே, அயோத்தி கன்டோன்மென்ட்டைச் சேர்ந்தவர். சுமார் மூன்று தசாப்தங்களாக ராம ஜென்மபூமி வழக்குடன் தொடர்புடையவராக இருந்துள்ளார்.
அறக்கட்டளையின் தகவலின்படி, 1990 முதல் 2019 வரை அலகாபாத் உயர் நீதிமன்றத்திலும், உச்ச நீதிமன்றத்திலும் ஸ்ரீ ராம் லல்லா விராஜ்மான் மற்றும் மகந்த் ஸ்ரீ ராம்சந்திர பரமஹம்ஸ் ஆகியோருக்காக அவர் ஆஜராகி வாதிட்டுள்ளார். இந்தக் காலகட்டம், ராம ஜென்மபூமி விவகாரத்தின் முக்கியமான கட்டங்களை உள்ளடக்கியதாகும். இறுதியில் 2019ஆம் ஆண்டு உச்ச நீதிமன்றம் வழங்கிய தீர்ப்பைத் தொடர்ந்து, அயோத்தியில் ராமர் கோயில் கட்டுவதற்கான பாதை திறக்கப்பட்டது.
பாண்டே, உத்தரப் பிரதேசத்தின் கூடுதல் அட்வகேட் ஜெனரலாகவும் ஆறு ஆண்டுகள் பணியாற்றியுள்ளார். தற்போது ஸ்ரீ ஹரி சத்சங்க சமிதியின் துணைத் தலைவராகவும், அயோத்தியில் உள்ள கதாக்கார் யோஜனா பயிற்சி மையத்தின் புரவலராகவும் உள்ளார்.
மகேஷ் பக்சந்த்கா
டெல்லியைச் சேர்ந்த 68 வயதான தொழிலதிபரும் சமூக சேவகருமான மகேஷ் பக்சந்த்கா, அறக்கட்டளையின் புதிய பொருளாளராக நியமிக்கப்பட்டுள்ளார். முன்னதாக பொதுச் செயலாளர் பதவிக்கு உயர்த்தப்பட்ட கோவிந்த் கிரி, சம்பத் ராய்க்குப் பதிலாக பொதுச் செயலாளராக நியமிக்கப்பட்டதைத் தொடர்ந்து, தற்போது பொருளாளர் பதவியை மகேஷ் பக்சந்த்கா ஏற்கிறார். அசோக் சிங்கால் அறக்கட்டளையுடன் இணைந்து செயல்பட்டு வரும் பக்சந்த்கா, உலக இந்து பொருளாதார மன்றத்தின் நிர்வாகக் குழு உறுப்பினராகவும் உள்ளார்.
ஸ்ரீ ராம வன கமன் யாத்திரையுடன் தொடர்புடைய 222 இடங்களில் ராம ஸ்தம்பங்களை நிறுவும் பணியிலும் அவர் பங்கேற்றுள்ளார். மேலும், ராமர் கோயிலுக்கான பூமி பூஜை மற்றும் பிராண பிரதிஷ்டை விழாக்களில் யஜமானராகவும் கலந்து கொண்டுள்ளார்.
பட்டதாரியான பக்சந்த்கா, ஹிந்துத்துவ கி ப்ரயாக் (“Hindutva Ke Prayog”) என்ற நூலை எழுதியுள்ளார். ராமர் கோயில் இயக்கத்தின் பின்னணியில் அசோக் சிங்கால் முக்கிய பங்கு வகித்தவர் என்பதால், பக்சந்த்காவின் அசோக் சிங்கால் அறக்கட்டளையுடனான தொடர்பு முக்கியத்துவம் வாய்ந்ததாகக் கருதப்படுகிறது.