‘போர்ட் மீட்டிங் வீடியோ, ஆடியோ பதிவுகளை கொடுங்க’: நோயல் டாடா அதிரடி கடிதம்; சந்திரசேகரன், வேணு சீனிவாசனுக்கு புதிய நெருக்கடி

எழுதியவர்: ஜார்ஜ் மேத்யூ

டாடா சன்ஸ் நிறுவனத்தின் நிர்வாகத் தலைவராக என். சந்திரசேகரன் மேலும் 5 ஆண்டுகளுக்கு மறுநியமனம் செய்யப்பட்ட நடைமுறைக்கு நேரடி எதிர்ப்புத் தெரிவித்துள்ள டாடா டிரஸ்ட்ஸ் தலைவர் நோயல் டாடா, இது தொடர்பான முக்கிய இயக்குநர் குழு கூட்டத்தின் ஆடியோ மற்றும் வீடியோ பதிவுகளைக் கோரியுள்ளார். கார்ப்பரேட் விவகாரங்கள் அமைச்சகத்திடம் மறுநியமனத் தீர்மானம் தாக்கல் செய்யப்பட்டதையும், இயக்குநர் வேணு சீனிவாசனின் பங்கையும் அவர் கேள்வி எழுப்பியுள்ளார். மேலும், டிவிஎஸ் மோட்டார் கம்பெனி மற்றும் சந்திரசேகரனின் நெருங்கிய குடும்பத்தினருடன் தொடர்புடைய நிறுவனம் ஆகியவற்றுக்கு இடையேயான வணிக ரீதியான பரிவர்த்தனைகள் குறித்த விவரங்களையும் அவர் கேட்டுள்ளார்.

ஆங்கிலத்தில் படிக்க:

டாடா சன்ஸ் நிறுவனத்தின் செயலாளர் சுப்ரகாஷ் முகோபாத்யாயாவுக்கு அக்டோபர் 26-ம் தேதியிட்டு நோயல் டாடா எழுதியுள்ள கடிதத்தில் (இதன் நகல் அனைத்து இயக்குநர்களுக்கும் அனுப்பப்பட்டுள்ளது), கூட்டத்தின் குறிப்புகள் இன்னும் இறுதி செய்யப்படாத நிலையிலும், தனது ஆட்சேபனைகளுக்கு தீர்வு காணப்படாத நிலையிலும், சர்ச்சைக்குரிய ஒரு தீர்மானம் முடிவடைந்த முடிவாகக் கருதப்படுவதாகக் குற்றம் சாட்டியுள்ளார். மேலும், செப்டம்பர் 17-ம் தேதி நடைபெற்ற இயக்குநர் குழு கூட்டத்தின் பதிவுகளை நிறுவனம் வழங்கத் தவறிவிட்டதாகவும் அவர் தெரிவித்துள்ளார். அக்கூட்டத்தில்தான் சந்திரசேகரனுக்கு 5 ஆண்டு பணி நீட்டிப்புக்கு ஒப்புதல் அளிக்கப்பட்டதுடன், நிறுவனத்தைப் பங்குச்சந்தையில் பட்டியலிடுவதற்கான முடிவும் எடுக்கப்பட்டது.

பதிவுகள் மற்றும் விவரங்களை வழங்குவதற்கு நிறுவனத்திற்கு 7 நாட்கள் கெடுவை இந்தக் கடிதம் நிர்ணயித்துள்ளது; அவ்வாறு வழங்கத் தவறினால் பாதகமான முடிவுகளை எடுக்க நேரிடும் என்றும் எச்சரித்துள்ளது.

“கூட்டத்தில் என்ன நடந்தது என்பதற்கான ஒரே நடுநிலையான பதிவு இந்த ஆடியோ/வீடியோ பதிவு மட்டுமே” என்று எழுதியுள்ள நோயல் டாடா, “கூட்டத்தில் கலந்துகொண்டு, தனது ஆட்சேபனைகளைப் பதிவு செய்த ஒரு இயக்குநரிடமிருந்து அதை மறைப்பதற்கு எந்த நியாயமான காரணமும் இருக்க முடியாது” என்றும் வாதிட்டுள்ளார்.

செப்டம்பர் 17-ம் தேதி கூட்டத்திற்காக வழங்கப்பட்ட அசல் மற்றும் திருத்தப்பட்ட நிகழ்ச்சி நிரல் என இரண்டிலும் சந்திரசேகரனின் மறுநியமனம் ஒரு முன்மொழியப்பட்ட தீர்மானமாக இடம்பெறவில்லை என்று நோயல் டாடா கூறியுள்ளார். நிகழ்ச்சி நிரலில் 7-வது அம்சம், “நியமனம் மற்றும் ஊதியக் குழுவின் அறிக்கை” என்று மட்டுமே குறிப்பிடப்பட்டிருந்தது. திருத்தப்பட்ட நிகழ்ச்சி நிரலில் இந்திய ரிசர்வ் வங்கியின் (ஆர்.பி.ஐ) செப்டம்பர் 11-ம் தேதியிட்ட கடிதம் மற்றும் அது தொடர்பான கேவியட் மனுக்கள் பற்றிய விவாதம் சேர்க்கப்பட்டிருந்தாலும், மறுநியமனம் பற்றி அதில் குறிப்பிடப்படவில்லை. இருந்தபோதிலும், அந்த அம்சத்தின் கீழ்தான் இந்தத் தீர்மானம் கொண்டுவரப்பட்டது என்று அவர் எழுதியுள்ளார்.

கூட்டக் குறிப்புகள் இறுதி செய்யப்படுவதற்கு முன்பும், தனது ஆட்சேபனைகளுக்குத் தீர்வு காணப்படாத நிலையிலும், மகாராஷ்டிரா மாநிலம் மும்பையில் உள்ள நிறுவனங்களின் பதிவாளரிடம் தீர்மானம் தாக்கல் செய்யப்பட்டதாகக் கூறப்படுவதையும் அவர் கேள்வி எழுப்பியுள்ளார்.  “நிறுவனத்தின் இயக்குநராக இருந்தபோதிலும், எனக்குத் தீர்மானத்தின் சான்றளிக்கப்பட்ட நகல் வழங்கப்படவில்லை என்பது ஏற்றுக்கொள்ள முடியாதது; மாறாக, பொதுவெளியில் உலா வரும் ஒரு தகவலை நம்பியிருக்க வேண்டிய கட்டாயத்தில் நான் உள்ளேன்” என்று அவர் எழுதியுள்ளார்.

ஆகஸ்ட் 13-ம் தேதி கோரிக்கை விடுக்கப்பட்டிருந்தும், விதி 118-ன் கீழ் எந்தவொரு தேர்வுக் குழுவும் அமைக்கப்படவில்லை என்றும், விதி 104பி-ன் கீழ் நியமிக்கப்பட்ட இயக்குநர்களிடமிருந்து பெறப்பட வேண்டிய ஒப்புதல் வாக்கு பெறப்படவில்லை என்றும் அக்கடிதம் வலியுறுத்துகிறது.

நிறுவனங்களின் பதிவாளரிடம் இதைத் தாக்கல் செய்ததன் மூலம், சர்ச்சைக்குரிய ஒரு முடிவு இயக்குநர் குழுவால் முழுமையாக நிறைவேற்றப்பட்டதாகக் காட்டப்பட்டுள்ளதாகவும், இது “பொதுமக்கள், நிறுவனத்தின் பங்குதாரர்கள் மற்றும் கட்டுப்பாட்டு அமைப்புகளுக்கு ஒரு தவறான தோற்றத்தை ஏற்படுத்துகிறது” என்றும் அவர் எச்சரித்துள்ளார்.

பதிவுகள் மற்றும் ஆவணங்களை வழங்க 7 நாட்கள் கெடு

செப்டம்பர் 17-ம் தேதி கூட்டத்தின் முழுமையான, திருத்தப்படாத ஆடியோ மற்றும் வீடியோ பதிவுகள், அதற்கான எழுத்துப்பூர்வப் பிரதிகள் மற்றும் அசல் பதிவுகளும் அவற்றின் மெட்டாடேட்டாவும் பாதுகாக்கப்பட்டுள்ளன என்பதற்கான உறுதிப்படுத்தல் ஆகியவற்றை நோயல் டாடா கோரியுள்ளார். மேலும், இறுதி செய்யப்பட்ட கையொப்பமிடப்பட்ட கூட்டக் குறிப்புகள் அல்லது கையொப்பமிடப்படாவிட்டால், அவர் முன்மொழிந்த திருத்தங்களில் எவை ஏற்றுக்கொள்ளப்பட்டன என்பதையும், ஏற்கப்படாத இடங்களில் அவரது கருத்து வேறுபாட்டையும் பதிவு செய்துள்ள திருத்தப்பட்ட வரைவு அறிக்கையையும் அவர் கேட்டுள்ளார்.

முறையான கூட்ட அறிவிப்பு, நிகழ்ச்சி நிரலின் அடுத்தடுத்த வடிவங்கள், அவை வழங்கப்பட்ட தேதிகள் மற்றும் நேரங்கள், மாற்றங்களைச் செய்ய அறிவுறுத்தியவர் யார் என்ற விவரங்கள் மற்றும் இயக்குநர் குழுவின் இணையச் செயலியில் பதிவேற்றப்பட்ட ஆவணங்களின் தணிக்கை வழி ஆகியவையும் கோரிக்கைகளில் அடங்கும்.

நிகழ்ச்சி நிரல் 6-வது அம்சத்தின் ஒவ்வொரு பகுதியிலும் நடந்த வாக்கெடுப்பு முடிவுகள், தீர்மானம் முன்மொழியப்பட்ட இடங்களில் தனிப்பட்ட இயக்குநர்களின் வாக்குகள் மற்றும் தேவையான ஒப்புதல் வாக்குகள் பெறப்பட்டனவா என்பதற்கான உறுதிப்படுத்தல் ஆகியவற்றையும் அவர் கோரியுள்ளார். மேலும், சான்றளிக்கப்பட்ட தீர்மானம் எப்போது வெளியிடப்பட்டது, அதற்கு யார் அதிகாரம் அளித்தது, அது கூட்டக் குறிப்புகளில் கையெழுத்திடுவதற்கு முன்பே நடந்ததா என்பது மற்றும் கார்ப்பரேட் விவகாரங்கள் அமைச்சகத்தில் தாக்கல் செய்யப்பட்ட அனைத்து ஆவணங்களையும் வெளியிடுமாறு நிறுவனம் கேட்கப்பட்டுள்ளது.

இந்தத் தீர்மானத்தின் செல்லுபடியாகும் தன்மையை தான் எதிர்ப்பதாகவும், கூட்டத்தின் பதிவுகள் முடிவாகும் வரை மேற்கொண்டு எந்த நடவடிக்கையும் எடுக்கப்பட மாட்டாது என்றும் டாடா சன்ஸ் நிறுவனம் எழுத்துப்பூர்வமாக நிறுவனங்களின் பதிவாளருக்குத் தெரிவிக்கும் என்பதற்கான உறுதிப்பாட்டையும் நோயல் டாடா கோரியுள்ளார்.

டி.வி.எஸ் மோட்டார் பரிவர்த்தனைகள்

இந்தக் கடிதத்தின் இரண்டாவது முக்கிய அம்சம் ஹன்னோ ஒன் வேர்ஹவுஸிங் பிரைவேட் லிமிடெட் (Hanno One Warehousing Pvt Ltd) நிறுவனம் தொடர்பானது. லலிதா சந்திரசேகரன் மற்றும் பிரணவ் சந்திரசேகரன் ஆகியோரை இயக்குநர்களாகக் கொண்ட இந்நிறுவனத்திற்கும் டி.வி.எஸ் மோட்டாருக்கும் இடையே உள்ளதாகக் கூறப்படும் வணிகத் தொடர்பு குறித்துக் கடிதத்தில் குறிப்பிடப்பட்டுள்ளது.

ஊடகச் செய்திகளை மேற்கோள் காட்டி, நிலம், கட்டுமானம் மற்றும் முன்மொழியப்பட்ட தொழில்துறை உள்கட்டமைப்பு தொடர்பான பரிவர்த்தனைகளை நோயல் டாடா சுட்டிக்காட்டியுள்ளார். கடிதத்தின்படி, டி.வி.எஸ் மோட்டார் நிறுவனம் தனது ஓசூர் ஆலைக்கு அருகில் உள்ள சுமார் 17.41 ஏக்கர் நிலத்தை ஜூன் 2025-ல் ஹன்னோ ஒன் நிறுவனத்திற்கு 29 ஆண்டுகளுக்கு குத்தகைக்கு விட்டுள்ளது. இந்த ஒப்பந்தத்தை ஹன்னோ ஒன் நிறுவனம் விரும்பினால் புதுப்பித்துக்கொள்ளலாம். டி.வி.எஸ் மோட்டார் நிறுவனத்திற்காகச் சுமார் 3.30 லட்சம் சதுர அடி பரப்பளவிலான ஒரு கட்டிடத்தை ஹன்னோ ஒன் கட்டி வருவதாகவும், அதற்கான வாடகை செலுத்துதல் நவம்பர் 2026-ல் தொடங்கும் என எதிர்பார்க்கப்படுவதாகவும் கூறப்படுகிறது.

டி.வி.எஸ் மோட்டார் மற்றும் அதன் விநியோகஸ்தர்களின் பயன்பாட்டிற்காக ரூ.330 கோடி மதிப்பில் ஒரு தொழில்துறைப் பூங்காவை அமைப்பதற்காக, டி.வி.எஸ் மோட்டாரின் மைசூர் தொழிற்சாலைக்கு அருகில் ஹன்னோ ஒன் நிறுவனத்திற்கு நிலம் ஒதுக்கப்பட்டது குறித்தும் இதில் குறிப்பிடப்பட்டுள்ளது. நவம்பர் 6, 2025 தேதியிட்ட கர்நாடக நிலத் தணிக்கைக் குழுவின் கூட்டக் குறிப்புகளைக் குறிப்பிடும் ஒரு அறிக்கையை நோயல் டாடா சுட்டிக்காட்டியுள்ளார். அதில் ஹன்னோ ஒன் பிரதிநிதி ஒருவர், தங்கள் நிறுவனம் “டி.வி.எஸ் மோட்டார் நிறுவனத்துடன் ஒப்பந்தம் செய்துள்ளது” என்று கூறியதாகத் தெரிவிக்கப்பட்டுள்ளது.

நிர்வாகத் தலைவரின் நெருங்கிய குடும்பத்தினர் சம்பந்தப்பட்ட ஒரு வணிகத் தொடர்பு குறித்து, அவரது மறுநியமனத்தைப் பரிசீலிக்கும்போது இயக்குநர் குழுவிற்குப் போதுமான தகவல்கள் கிடைத்தனவா என்பதே இந்தக் கடிதத்தில் டாடா எழுப்பியுள்ள முக்கியக் கேள்வியாகும்.

சீனிவாசனின் பங்கு குறித்துக் கேள்வி

டி.வி.எஸ் மோட்டார் நிறுவனத்தின் ஓய்வுபெற்ற தலைவர் (Chairman emeritus) வேணு சீனிவாசன், செப்டம்பர் 3-ம் தேதி நடைபெற்ற நியமனம் மற்றும் ஊதியக் குழு கூட்டத்திலும், செப்டம்பர் 17-ம் தேதி நடைபெற்ற டாடா சன்ஸ் இயக்குநர் குழு கூட்டத்திலும் பங்கேற்றதை நோயல் டாடா குறிப்பாகக் கேள்வி எழுப்பியுள்ளார். நிர்வாகத் தலைவரின் செயல்திறன் மற்றும் ஊதியத்தை மதிப்பாய்வு செய்யும் குழுவில் சீனிவாசனும் ஒரு உறுப்பினராவார்.

நோயல் டாடாவின் கூற்றுப்படி, அவர் அக்குழுவின் விவாதங்களில் பங்கேற்று, விதி 104பி-ன் கீழ் நியமிக்கப்பட்ட இயக்குநரின் வாக்கை அளித்துள்ளார். அந்த வாக்கை அடிப்படையாகக் கொண்டே மறுநியமனத் தீர்மானம் நிறைவேற்றப்பட்டதாக நிறுவனம் கருதுகிறது.

டி.வி.எஸ் மோட்டார் மற்றும் ஹன்னோ ஒன் இடையேயான பரிவர்த்தனைகள், சந்திரசேகரனின் மறுநியமனத்தை மதிப்பிடும்போது சீனிவாசனை ஒரு முரண்பாடான நிலையில் வைத்திருப்பதாக நோயல் டாடா வாதிட்டுள்ளார். “ஒரு தொண்டு நிறுவன அறக்கட்டளையால் பரிந்துரைக்கப்பட்ட இயக்குநராக, அவர் அறக்கட்டளைக்கு மட்டுமல்ல, அந்த அறக்கட்டளைகளின் அடையாளம் தெரியாத பயனாளிகளுக்கும் விசுவாசமாகச் செயல்படும் கடமையைக் கொண்டுள்ளார்” என்று எழுதியுள்ள நோயல் டாடா, அதற்கான தேவையான தரம் “தூய்மையான, கலப்படமற்ற பொதுநலன்” சார்ந்தது என்றும் குறிப்பிட்டுள்ளார்.

இந்தக் கூறப்படும் பரிவர்த்தனைகள் குறித்த எந்தவொரு தகவலும் டாடா சன்ஸ் இயக்குநர் குழுவின் முன் வைக்கப்பட்டதாகத் தனக்கு நினைவில் இல்லை என்று நோயல் டாடா கூறியுள்ளார். செப்டம்பர் 17 கூட்டத்தில் நிறுவனங்கள் சட்டம் பிரிவு 184-ன் கீழ் பதிவு செய்யப்பட்ட வெளிப்படுத்தல்கள், ஜூன் 10, 2026 அன்று டி.வி.எஸ் குழும நிறுவனங்களின் இயக்குநர் பொறுப்பிலிருந்து சீனிவாசன் விலகிவிட்டார் என்பதையே குறிப்பிடுகின்றனவே தவிர, ஹன்னோ ஒன் தொடர்பான உறவைப் பற்றிக் குறிப்பிடவில்லை என்று அவர் எழுதியுள்ளார்.

அவரது கடிதத்தின்படி, ஹன்னோ ஒன் நிறுவனம் தொடங்கப்பட்டது குறித்து சந்திரசேகரன் தலைவராக உள்ள நிறுவனங்களுக்கு ஏப்ரல் 2025-ல் தெரிவிக்கப்பட்டுவிட்டதாகவும், டி.வி.எஸ் மோட்டார் உடனான பரிவர்த்தனையை டாடா சன்ஸிடம் தெரிவிக்க வேண்டிய அவசியமில்லை என்றும் டாடா சன்ஸ் செய்தித் தொடர்பாளர் கூறியதாகத் தெரிவிக்கப்பட்டுள்ளது.

ஏப்ரல் 2025-ல் அளிக்கப்பட்ட அசல் அறிக்கை, தொடர்புடைய நலன் சார்ந்த அறிவிப்புகள், டாடா நடத்தை விதிகளின் கீழ் சந்திரசேகரனின் வருடாந்திர உறுதிமொழிகள், ஏதேனும் முரண்பாடுகள் குறித்த மதிப்பாய்வுப் பதிவுகள் மற்றும் இந்தப் பரிவர்த்தனையை வெளிப்படுத்தத் தேவையில்லை என்ற நிறுவனத்தின் நிலைப்பாட்டிற்கான அடிப்படை ஆகியவற்றை நோயல் டாடா கோரியுள்ளார்.

டாடா சன்ஸின் சட்டக் கருத்துகள்

மறுநியமனம் தொடர்பாகச் சட்டக் கருத்துகள் பெறப்பட்ட சூழ்நிலைகளையும் இந்தக் கடிதம் கேள்வி எழுப்பியுள்ளது. தீர்மானத்தின் முடிவு பொதுவெளியில் அறிவிக்கப்பட்ட பின்னரே, ஓய்வுபெற்ற நீதிபதிகள் உதய் யு. லலித் மற்றும் பி.என். ஸ்ரீகிருஷ்ணா ஆகியோரின் கருத்துகள் கோரப்பட்டதாக நோயல் டாடா கூறியுள்ளார்.

நீதிபதி லலித்தின் கருத்தைக் கோரியவர்களில் சீனிவாசனும் ஒருவர் என்பதை அவர் சுட்டிக்காட்டியுள்ளார். சீனிவாசன் பங்கேற்ற வாக்கெடுப்பின் செல்லுபடியாகும் தன்மை குறித்து அவரே ஆலோசனை கோரியது கேள்விகளை எழுப்புகிறது. வழக்கறிஞர்களுக்கு வழங்கப்பட்ட அறிவுறுத்தல்கள் மற்றும் ஆவணங்கள், இந்தக் கருத்துகளைப் பெற அதிகாரம் அளித்தவர் யார் என்ற விவரங்கள் மற்றும் டி.வி.எஸ் மோட்டார் பரிவர்த்தனைகள் குறித்து அவர்களிடம் தெரிவிக்கப்பட்டதா என்பதற்கான உறுதிப்படுத்தல் ஆகியவற்றை நோயல் டாடா கோரியுள்ளார்.

விதி 121பி-யைப் பயன்படுத்தி, கூறப்படும் தகவல்களை மறைத்த விவகாரம், சீனிவாசனின் பங்கேற்பு, விதி 118-ன் கீழ் தேர்வுக் குழு அமைக்கப்படுவது மற்றும் டாடா சன்ஸின் நிலை மற்றும் முன்மொழியப்பட்ட மறுசீரமைப்பு தொடர்பான ரிசர்வ் வங்கியின் செப்டம்பர் 11 கடிதம் ஆகியவற்றைப் பரிசீலிக்குமாறு அவர் இயக்குநர் குழுவைக் கேட்டுக்கொண்டுள்ளார்.

இயக்குநர் குழு ஆவணங்கள், நிகழ்ச்சி நிரலின் தணிக்கைப் பாதைகள், உள் தொடர்புகள், வெளிப்படுத்தப்பட்ட தகவல்கள் மற்றும் ஹன்னோ ஒன் தொடர்பாகப் பத்திரிகைகளுக்கு அளிக்கப்பட்ட தகவல்கள் உள்ளிட்ட தொடர்புடைய ஆவணங்களைப் பாதுகாப்பதற்கான அறிவுறுத்தல்களுடன் அந்தக் கடிதம் முடிவடைந்துள்ளது.