வாஷிங்டன்: இந்தியா மீது 100 சதவீதம் வரை கூடுதல் வரி விதிக்க வழிவகுக்கும் ரஷிய எரிபொருட்கள் மீதான தடையை ரத்து செய்து அமெரிக்க அதிபர் டொனால்டு டிரம்ப் கையெழுத்திட்டுள்ளார்.
‘லிண்ட்சே கிரஹாம் ரஷ்யா மற்றும் ஈரான் மீதான தடைகள் சட்டம்’ என்ற சட்டம், அதிபர் டிரம்ப்பால் கடந்த மாதம் கையெழுத்திடப்பட்டது. இச்சட்டம், ரஷ்யாவிடமிருந்து கணிசமாக கச்சா எண்ணெய் மற்றும் இயற்கை எரிவாயு வாங்கும் இந்தியா, சீனா உள்ளிட்ட நாடுகள் மீது 100 சதவீதம் வரை கூடுதல் வரி விதிக்க வழிவகை செய்தது.
இந்நிலையில், சட்டத்தின் முக்கிய அம்சங்கள் அமலுக்கு வருவதற்கு முந்தைய நாளான நேற்று முன்தினம், இச்சட்டத்தின் கீழ் நாடுகளுக்கு விதிக்கப்படக்கூடிய தடைகள், கட்டுப்பாடுகள் மற்றும் வரி விதிப்புகளை நீக்கும் உத்தரவில் டிரம்ப் கையெழுத்திட்டுள்ளார். அமெரிக்காவின் தேசிய நலன் கருதி இந்த விலக்கு அளிக்கப்படுவதாக அவர் தெரிவித்துள்ளார்.
முன்னதாக, இந்த சட்டத்தின்படி, ரஷ்யாவிடமிருந்து அதிக அளவில் கச்சா எண்ணெய் மற்றும் இயற்கை எரிவாயு இறக்குமதி செய்யும் ஐந்து நாடுகள், இன்று முதல் ரஷ்ய எரிசக்தி பொருட்களை புதிதாக வாங்கினால், அந்த நாடுகளிலிருந்து அமெரிக்காவுக்கு இறக்குமதி செய்யப்படும் பொருட்கள் மீது 100 சதவீதம் வரை கூடுதல் வரி விதிக்க அதிபருக்கு அதிகாரம் வழங்கப்பட்டிருந்தது.
இந்தியாவும் சீனாவும் ரஷ்ய எரிசக்தி பொருட்களை அதிக அளவில் வாங்கும் நாடுகள் என்பதால், இந்நடவடிக்கையால் பாதிக்கப்படும் அபாயம் இருந்தது. தற்போது டிரம்ப் இதை திரும்ப பெற்றதால்,, இந்த வரி அச்சுறுத்தலில் இருந்து இந்தியாவுக்கு மிகப்பெரிய நிவாரணம் கிடைத்துள்ளது.
இந்த விலக்கு எவ்வளவு காலம் நீடிக்கும் என்பது குறித்து குறிப்பிடப்படவில்லை. டிரம்ப் அல்லது அவரது அரசு வேறு முடிவு எடுக்கும் வரை இந்த உத்தரவு அமலில் இருக்கும் என கூறப்படுகிறது.