எழுதியவர்:ஜோதி ஜா
சினிமாவுக்கு பெரிய பட்ஜெட் முக்கியம் அல்ல, நல்ல கதை இருந்தால் போதும், எந்த படமும் வெற்றி பெறும் என்பதற்கு உதாரனமாக நல்ல கதையம்சம் கொண்ட படங்கள் வெற்றி பெற்று வருகின்றனர். அந்த வரிசையில் சமீபத்திய ஒரு படம் 3 கோடி பட்ஜெட்டில் தயாராகி ரூ100 கோடி வசூலை கடந்துள்ளது.
இந்த செய்தியை ஆங்கிலத்தில் படிக்க இங்கே க்ளிக் செய்யவும்:
2026-ஆம் ஆண்டு சிறிய பட்ஜெட் திரைப்படங்களுக்கு ஒரு சிறந்த ஆண்டாக அமைந்துள்ளது. இந்த வெற்றிப் பட்டியலில் புதிதாக இணைந்துள்ள கன்னடத் திரைப்படமான ‘பிரேமத ஊரல்லி’ (Premada Ooralli), சுமார் ரூ. 3 கோடி பட்ஜெட்டில் உருவாக்கப்பட்ட, இந்த படம் இதுவரை ரூ. 107 கோடிக்கும் அதிகமாக வசூலித்துள்ளது. 29-வது நாளிலும் பல திரையரங்குகளில் அனைத்துக் காட்சிகளுமே ‘ஹவுஸ்ஃபுல்’ (Houseful) ஆகிவரும் வேளையில், இப்படத்தின் வெற்றிப் பயணம் எளிதானதாக இருக்கவில்லை.
படம் வெளியான முதல் நாளில், பல திரையரங்குகள் கடைசி நேரத்தில் காட்சிகளை ரத்து செய்தன; அதே வேளையில் தயாரிப்பாளர்கள் பலரும் இப்படத்தை வெளியிடுவதில் முதலீடு செய்யத் தயங்கினர். ஸ்கிரீன் (SCREEN) தளத்திற்கு அளித்த சிறப்புப் பேட்டியில், இப்படத்தின் ஒளிப்பதிவாளர் ராஜ்காந்த் எஸ்.கே, ஒரு பிரபல தயாரிப்பாளரிடம் இப்படத்தை நிராகரித்தால் பின்னாளில் வருந்துவீர்கள் என்று எச்சரித்ததாக நினைவு கூர்ந்தார். இன்று, அதே தயாரிப்பாளர் இயக்குநரைச் சந்திக்க அனுமதி (appointment) கேட்டுத் தவிப்பதாக அவர் கூறுகிறார்.
வெயிட்டராக இருந்து புகழ்பெற்ற ஒளிப்பதிவாளர் வரை
ராஜ்காந்த் முறைப்படி ஒளிப்பதிவு பயின்றவர் அல்ல. சொல்லப்போனால், அவரிடம் கல்லூரிப் பட்டப் படிப்போ, முறையான பள்ளிப் படிப்போ கூட முழுமையாக இல்லை. இருப்பினும், தனது சொந்த ஊரான ஹாசனிலிருந்து திரையுலகின் ஆடை வடிவமைப்பு மற்றும் ஒப்பனைத் துறைகளில் பணியாற்றிய சிலரின் ஈர்ப்பால், தானும் சினிமா துறைக்கு வர முடிவெடுத்தார். ஊரில் அவர்களுக்குக் கிடைத்த மரியாதையும் கவனமும் தனக்கும் கிடைக்க வேண்டும் என்ற நம்பிக்கையில், ஹாசனிலிருந்து வெளியேறி ஒரு பப்பின் (Pub) தூய்மைப் பணியாளராகச் சேர்ந்தார். விரைவில், அங்கு கிடைத்த தொடர்புகள் மூலம் சினிமா துறையில் தடம் பதித்தார்.
இது குறித்து பேசிய அவர், இது எனக்கு முற்றிலும் புதிய உலகமாக இருந்தாலும், என்னை மேம்படுத்தக்கூடிய மிக முக்கியமான வேலை எதுவென்று எனக்குள் தொடர்ந்து கேட்டுக்கொண்டே இருந்தேன். அது கேமராமேன் வேலைதான் என்பதைப் புரிந்துகொண்டேன். ஒரு கேமராமேனாக என்னால் கதைகளைச் சொல்ல முடியும், பலருக்கு வேலை வழங்கவும் முடியும். எனக்கு எப்போதும் புகைப்படக் கலையில் ஆர்வம் உண்டு, அனைத்தையும் மொபைல் போன்கள் மூலமே கற்றுக்கொண்டேன்.
ஒரு தொலைக்காட்சித் தொடரில் உதவியாளராகப் பணியாற்றினேன், ஆனால் அங்கு எனக்கு எதுவும் கற்றுகொள்ள முடியவில்லை. நான் இயக்குநருக்குப் பின்னால் நின்று, மானிட்டரைப் பார்த்து விஷயங்கள் எவ்வாறு உருவாக்கப்படுகின்றன என்பதைக் கவனிப்பேன். வேகமாகவும் சுறுசுறுப்பாகவும் வேலை செய்யக் கற்றுக்கொண்டேன், இறுதியாக ட்ரோன்களை (Drones) இயக்கவும் பழகினேன். 2014-2015 காலகட்டத்தில் அதுவே புதிய தொழில்நுட்பமாக இருந்தது. மாதம் 15 முதல் 20 திட்டங்களுக்கு (projects) ட்ரோன் இயக்கும் வேலைகளைச் செய்தேன்.”
‘மற்றவர்களின் தவறுகளிலிருந்து கற்றுக்கொண்டேன்’
முறையான பயிற்சி இல்லாதது ஒரு தடையாக மாற அனுமதிக்காமல், திரைத்துறையில் உள்ள பல்வேறு நபர்களுடன் பணியாற்றி, அவர்களின் நுட்பங்களைக் கவனித்தும் தவறுகளிலிருந்து பாடம் கற்று முன்னேறினேன். மற்றவர்கள் வேலை செய்வதைப் பார்க்கும்போது, இந்தக் காட்சியை நான் எப்படி வேறுவிதமாகப் படமாக்கியிருப்பேன் என்று எனக்குள்ளேயே கற்பனை செய்துபார்ப்பேன். அதுவே எனக்குப் பெரிதும் உதவியது” என்றார்.
இன்று, ஆரம்பத்தில் ரூ.1 கோடி பட்ஜெட்டில் தொடங்கப்பட்டு பிரம்மாண்ட வெற்றியைப் பெற்றுள்ள ‘பிரேமத ஊரல்லி’ படத்தின் வியக்கவைக்கும் காட்சிகள், கோணங்கள் மற்றும் காட்சிகளின் அமைப்பிற்குச் சொந்தக்காரர் இவர்தான். இத்திட்டத்தில் இணைந்தது குறித்து ராஜ்காந்த் கூறுகையில், “நான் இந்தக் குழுவில் இணைந்தபோது, அவர்களின் பார்வையையும் எதைச் சாதிக்க விரும்புகிறார்கள் என்பதையும் புரிந்துகொண்டேன்.
அவர்களின் பட்ஜெட்டைப் புரிந்து கொண்டு, எனது தொடர்புகள் அனைத்தையும் பயன்படுத்தி படப்பிடிப்பிற்குத் தேவையான கேமராக்கள் மற்றும் உபகரணங்களின் செலவைக் குறைத்தேன். ஒரு நாளைக்கு ரூ. 25,000 செலவாகும் உபகரணங்கள், நண்பர்கள் மற்றும் தொடர்புகள் மூலம் எங்களுக்கு ரூ.11,000-க்குக் கிடைத்தன. குறைந்த பட்ஜெட் என்று கூறும்போது, படத்தின் தரத்தில் நாங்கள் எந்தச் சமரசமும் செய்து கொள்ளவில்லை என்பதே பொருள்.
ஆரம்பத்தில், இப்படத்திற்கு இயக்குநர் மனோஜ் குமாரின் சகோதரரும் மமதா தேவேந்திராவும் நிதியுதவி செய்தனர். செலவுகள் அதிகரித்தபோது, அவர்களின் வட்டாரத்தைச் சேர்ந்த மேலும் பல நபர்கள் முன்வந்து, சிலர் ரூ. 10 லட்சமும், சிலர் ரூ. 20 லட்சமும் முதலீடு செய்தனர். இறுதியில் முதலீட்டாளர்களின் எண்ணிக்கை 15 ஆக உயர்ந்தது. ஆனால், ராஜ்காந்த் தனிப்பட்ட முறையில் அவர்களில் 7 பேரை மட்டுமே சந்தித்ததாகக் கூறினார்.
“அவர்கள் அனைவரும் குடும்ப ரீதியாக இயக்குநர்களுடனும் தயாரிப்பாளர்களுடனும் தொடர்பு உடையவர்கள். அவர்கள் மனோஜ் குமாரை நம்பினார்கள். அவர் ‘அக்ஷி’ (Akshi) படத்தை உருவாக்கியபோது கடன் வாங்கியிருந்தார், ஆனால் தேசிய விருது பெற்ற பிறகு அனைவரின் கடனையும் அடைத்துவிட்டார். அது அவர்களிடம் நம்பிக்கையை உருவாக்கியது. தங்களின் பணம் வீணாகாது என்பதை அவர்கள் அறிந்திருந்தனர்,” என்றார்.
சவால்கள் இருந்தபோதிலும், இயக்குநரும் ஒளிப்பதிவாளரும் படத்தின் வெற்றி வாய்ப்புகள் குறித்து நம்பிக்கையுடனேயே இருந்தனர். வெறும் ரூ. 3 கோடி பட்ஜெட்டில் 100 தொழில்நுட்பக் கலைஞர்கள் மற்றும் ஒரு மாதத்திற்கும் மேலான படப்பிடிப்பு என்பதை நம்புவதற்குத் கடினமாக இருக்கலாம், ஆனால் ‘பிரேமத ஊரல்லி’ திரைப்படம் ஒரு முழு கிராமத்தின் ஆதரவுடன் உருவாக்கப்பட்டது. படப்பிடிப்பின் போது தினமும் 100-க்கும் மேற்பட்ட குழு உறுப்பினர்கள் பணியாற்றினர்.
இருப்பினும் படத்தின் தொழில்நுட்பத் தரத்தைக் குறைக்காமல் செலவைக் கட்டுப்பாட்டிற்குள் வைத்திருக்கக் குழுவினர் வழிகளைக் கண்டறிந்தனர். எங்கள் குழுவில் தினமும் 100-க்கும் மேற்பட்டோர் இருந்தனர். அது ஒரு பெரிய தயாரிப்பு நிறுவனத்தை நடத்துவது போலிருந்தது. ஆனால் அனைவருக்கும் தனித்தனி அறைகள் மற்றும் லாட்ஜ்களைப் பதிவு செய்வதற்குப் பதிலாக, நாங்கள் திருமண மண்டபங்களை வாடகைக்கு எடுத்து, தற்காலிகக் கழிப்பறைகளைக் கட்டி, அனைவரும் ஒரே மண்டபத்தில் தங்கினோம்.
நடிகர்களுக்கு மட்டும் லாட்ஜ்களைப் பதிவு செய்தோம். சுமார் 50 பேர் தங்குவதற்கு வசதியான ஒரு திருமண மண்டபத்தை ரூ. 50,000 வாடகையில் எடுத்தோம். பல உள்ளூர்வாசிகளும் எங்களுக்குத் தங்குமிடம் கொடுத்து உதவினர்,” என்று ராஜ்காந்த் கூறினார். பெரும்பாலான படப்பிடிப்பு ஹாசனில் நடந்தது, அங்கு மனோஜ் குமாருக்கு அந்தப் பகுதியுடன் இருந்த பழக்கம் மிகவும் பயனுள்ளதாக இருந்தது.
இயக்குநர் அதே கிராமத்தைச் சேர்ந்தவர் என்பதால் பெரும்பாலான மக்களைத் தெரிந்திருந்தது. படப்பிடிப்பு இடங்களுக்கு நாங்கள் அதிகம் பணம் செலுத்த வேண்டியதில்லை. பலர் தங்களது இடங்களை இலவசமாகப் பயன்படுத்த அனுமதித்தனர். விவசாய நிலங்களைப் பயன்படுத்திய இடங்களில், நில உரிமையாளர்களுக்கு, குறிப்பாக அவர்களின் பயிர்களுக்கு எந்த இழப்பும் ஏற்படக் கூடாது என்பதற்காகச் சிறிய தொகையைச் செலுத்தினோம்,” என்று அவர் கூறினார். இதன் காரணமாக, பட்ஜெட்டின் பெரும்பகுதி படப்பிடிப்பில் ஈடுபட்டவர்களின் ஆடம்பர வசதிகளை விட, படத்தின் தொழில்நுட்பத் தேவைகளுக்கே பயன்படுத்தப்பட்டது.
ஊரெங்கும் பேசப்பட்ட விளம்பர உத்தி (Marketing Strategy)
படத்தை நிறைவு செய்வது பாதி கிணற்றைக் கடப்பது போலத்தான். குழுவினர் விளம்பரம் செய்து படத்தை வெளியிட வேண்டிய நேரத்தில், அவர்களிடம் மிகக் குறைந்த பணமே எஞ்சியிருந்தது. படத்தின் வெளியீட்டிற்குப் படத்தின் பிற்பகுதிச் செலவுகளுக்குக் குறைந்தது ரூ. 10-15 லட்சம் முதலீடு செய்யுமாறு பல தயாரிப்பாளர்களிடம் கெஞ்சினோம். பல தயாரிப்பாளர்களுக்குப் திரையிட்டுக் காட்டினோம். அவர்களுக்குப் படம் பிடித்திருந்தது, ஆனால் யாரும் முதலீடு செய்ய ஒப்புக்கொள்ளவில்லை. யாருமே ஆர்வம் காட்டவில்லை,” என்று ராஜ்காந்த் நினைவு கூர்ந்தார்.
அப்போதுதான் மனோஜ் குமார் ஒரு வித்தியாசமான சந்தைப்படுத்தல் உத்தியைக் கொண்டு வந்தார். அவர் 10,000-க்கும் மேற்பட்ட ரேடியம் ஸ்டிக்கர்களை அச்சடித்து, கர்நாடகா முழுவதிலும் உள்ள ஆட்டோரிக்ஷாக்களின் பின்புறத்தில் ஒட்டினார். அவரே நேரில் சென்று இதைச் செய்தார். ஒவ்வொரு ஸ்டிக்கரும் ரூ. 80 செலவானது, அது நமக்குச் சாதகமாக அமைந்தது. அடுத்த கட்டமாக அழைப்பிதழ்களை அச்சடித்தோம், இந்த ஸ்டிக்கர்களுக்கு ரூ. 6 முதல் 8 லட்சம் வரை செலவானது என்று ராஜ்காந்த் கூறினார்.
மக்களைக் கூட்டுவதற்காகப் விளம்பர நிகழ்ச்சிகளை நடத்துவதற்குப் பதிலாக, குழுவினர் ஒவ்வொருவரையும் தனித்தனியாக அணுகிப் படத்தைப் பார்க்க வருமாறு அழைத்தனர். நாங்கள் வெளியே சென்று, மக்களுக்கு அழைப்பிதழ்களை வழங்கி, எங்கள் வீட்டுத் திருமணத்திற்கு அழைப்பது போல் படத்தைப் பார்க்க அழைத்தோம்,” என்று அவர் மேலும் கூறினார்.
கடைசி நேர ரத்துகள், ஆனாலும் தளராத நம்பிக்கை
திரைப்படம் வெளியாகும் வரை போராட்டங்கள் நீடித்தன. ஆரம்பத்தில் திரையிட ஒப்புக்கொண்ட பல திரையரங்க உரிமையாளர்கள் கடைசி நேரத்தில் பின்வாங்கினர், சிலர் பெரிய படங்களின் வெளியீட்டிற்கு முன்னுரிமை அளித்தனர். பிரபல தயாரிப்பாளர்கள் தங்கள் திரையரங்குகளை வாடகைக்கு எடுத்துள்ளதாகக் கூறி, சிலர் இதன் போஸ்டர்களை ஒட்டக்கூட மறுத்துவிட்டனர். பல காட்சிகள் ரத்து செய்யப்பட்டன.
இருப்பினும், பொதுமக்கள் படத்தை நிச்சயமாகக் கொண்டாடுவார்கள் என்பதில் படக்குழுவினர் நம்பிக்கையுடன் இருந்தனர். குறைந்த விளம்பரமே இருந்தபோதிலும், திரையிட்ட ஒரு ஒற்றைத் திரை திரையரங்கில் (Single-screen theatre) இரண்டாவது காட்சியிலேயே 400-க்கும் மேற்பட்ட டிக்கெட்டுகள் விற்றுத் தீர்ந்தது. “மக்கள் நடனமாடவும் சத்தமிடவும் தொடங்கினர். அவர்கள் பட ரசிப்பதைப் பார்த்தபோது, நாங்கள் வெற்றி பெற்றுவிட்டோம் என்று உணர்ந்தோம்.
கர்நாடகாவைச் சேர்ந்த மூத்த பத்திரிகையாளர்கள் எங்களைப் பாராட்டினர், மக்களின் வாய்வழிப் பேச்சு பரவத் தொடங்கியது. இரண்டாம் நாளிலிருந்து திரையரங்குகளில் இருந்து அழைப்புகள் வரத் தொடங்கின. பின்னர் ரகு சார், ஜெயண்ணாவை அணுகினார், அவர் கர்நாடகா முழுவதும் படத்தை விநியோகிக்க உதவினார், காட்சிகளின் எண்ணிக்கையும் அதிகரித்தது,” என்றார் ராஜ்காந்த.
ப்ளாக்கில் விற்கப்படும் டிக்கெட்டுகள், திரையரங்க உரிமையாளர்களுக்கு ரூ. 5 லட்சம் கூடுதல் வருமானம்
படத்தின் பிரபலம் காரணமாக கிராமப்புற திரையரங்குகளில் அசாதாரணமான காட்சிகள் காணப்படுகின்றன. பார்வையாளர்களுக்கு இடமளிக்க உரிமையாளர்கள் நாற்காலிகளைப் போட்டும், கம்பளங்களை விரித்தும் வசதி செய்து தருகின்றனர். மக்கள் தரையில் உட்கார்ந்து கூட படத்தைப் பார்க்கிறார்கள். சில இடங்களில் டிக்கெட்டுகள் ப்ளாக்கில் (Black) ரூ. 500 வரை விற்கப்படுகின்றன. இது கர்நாடகாவில் பலருக்கு வாழ்வாதாரத்தை உருவாக்கியுள்ளது.
டிக்கெட்டுகள் ப்ளாக்கில் விற்கப்படும் கதைகளைக் கேட்டு நீண்ட நாட்களாகிவிட்டன,” என்று ராஜ்காந்த் கூறினார். மேலும், “இந்த டிக்கெட்டுகள் மூலம் திரையரங்க உரிமையாளர்கள் குறைந்தபட்சம் ரூ. 5 லட்சம் கூடுதலாகச் சம்பாதிக்கிறார்கள்” என்றும் அவர் தெரிவித்தார்.
‘எங்களை நிராகரித்த தயாரிப்பாளர்கள் தூக்கமின்றி தவிக்கிறார்கள்’
இப்படம் தற்போது பாக்ஸ் ஆபீஸில் ஒரு மாபெரும் சாதனையாக உருவெடுத்துள்ள நிலையில், அதை ஆதரிக்க மறுத்த தயாரிப்பாளர்கள் தங்களின் முடிவிற்காக வருந்துவதாக ராஜ்காந்த் கூறினார். போஸ்ட் புரொடக்ஷன் மற்றும் ரிலீஸுக்கு உதவும் தயாரிப்பாளர்களை நாங்கள் தேடிக்கொண்டிருந்தபோது, திரையுலகில் உள்ள ஒரு பெரிய புள்ளியை அணுகினேன். இந்தப் படத்தை கைவிட்டால் பின்னாளில் வருந்துவீர்கள் என்று அவரிடம் சொன்னேன். படம் வெளியானதும் எங்கள் இயக்குநரைச் சந்திக்க உங்களால் நேரம் பெற முடியாது என்றும் எச்சரித்தேன். ஆனால் அவர் கேட்கவில்லை.
படம் வெளியாகிப் பெரிய வரவேற்பைப் பெற்ற பிறகு, அவர் என்னை அழைத்து எங்கள் இயக்குநருடன் ஒரு சந்திப்பிற்கு ஏற்பாடு செய்யுமாறு கேட்டார். இப்போது அது சாத்தியமில்லை என்று அவரிடம் கூறிவிட்டேன். எங்களை நிராகரித்த அனைத்துத் தயாரிப்பாளர்களும் தங்களின் குற்ற உணர்ச்சியாலும் வருத்தத்தாலும் தூக்கமின்றி தவித்து வருகின்றனர்,” என்று ராஜ்காந்த் கூறினார். .
‘பிரேமத ஊரல்லி’ திரைப்படம் தற்போது கன்னடத் திரைத்துறை வரலாற்றிலேயே அதிக வசூல் செய்த ஆறாவது திரைப்படமாகவும், லாப வரம்புகளின் அடிப்படையில் இதுவரை இல்லாத அளவிற்கு அதிக லாபம் ஈட்டிய கன்னடத் திரைப்படமாகவும் உருவெடுத்துள்ளது. இதன் லாப விகிதம் யாஷின் ‘கே.ஜி.எஃப்’ (KGF) மற்றும் ரிஷப் ஷெட்டியின் ‘காந்தாரா’ (Kantara) போன்ற படங்களின் லாபத்தையும் மிஞ்சியுள்ளது. மனோஜ் குமார் இயக்கியுள்ள இப்படத்தில் ஸ்ரீராம், ரங்காயண ரகு, தபஸ்வினி பூனாச்சா மற்றும் ரமிகா ஷிவு ஆகியோர் நடித்துள்ளனர்.