பி.பி.எஃப். (PPF – Public Provident Fund) என்பது நீண்ட கால அடிப்படையில் பெரிய அளவிலான நிதியை உருவாக்க மத்திய அரசால் வழங்கப்படும் ஒரு பாதுகாப்பான சிறுசேமிப்புத் திட்டமாகும். தற்போது இத்திட்டத்திற்கு ஆண்டிற்கு 7.1% வட்டி வழங்கப்பட்டு வருகிறது. மேலும் இதன் முதிர்வு காலம் 15 ஆண்டுகள் ஆகும்.
ஒருவர் ஆண்டிற்கு ரூ. 1.2 லட்சம் சேமிக்க விரும்பினால், அதை ஒரே தவணையாக முதலீடு செய்வது நல்லதா அல்லது மாதம் ரூ. 10,000 ஆக முதலீடு செய்வது சிறந்ததா? எந்த முறையில் அதிக முதிர்வுத் தொகை கிடைக்கும்?
பி.பி.எஃப். வட்டி கணக்கீடு:
பி.பி.எஃப். கணக்கில், ஒவ்வொரு மாதமும் 5-ஆம் தேதிக்கும் மாதத்தின் கடைசி நாளுக்கும் இடைப்பட்ட காலத்தில் இருக்கும் குறைந்தபட்ச இருப்பைக் (Lowest Balance) கொண்டு வட்டி கணக்கிடப்படுகிறது. இந்த வட்டித் தொகை நிதியாண்டின் இறுதியில் கணக்கில் சேர்க்கப்படும்.
பி.பி.எஃப். கணக்கில் ஒரு நிதியாண்டில் குறைந்தபட்சம் ரூ. 500 முதல் அதிகபட்சமாக ரூ. 1.5 லட்சம் வரை முதலீடு செய்ய முடியும். ஆண்டிற்கு ஒரே தவணையாக முதலீடு செய்து அதிக வட்டி லாபம் பெற விரும்பினால், ஒவ்வொரு ஆண்டும் ஏப்ரல் 5-ஆம் தேதிக்குள் அந்தத் தொகையை வைப்பு செய்வது சிறந்தது.
மாதம் ரூ. 10,000 முதலீடு:
15 ஆண்டுகளுக்கு மாதம் ரூ. 10,000 வீதம் முதலீடு செய்தால்:
மொத்த முதலீட்டுத் தொகை: ரூ. 18,00,000
கணக்கிடப்படும் வட்டி (7.1% அடிப்படையில்): ரூ. 13,55,680
15 ஆண்டுகள் கழித்து கிடைக்கும் மொத்த முதிர்வுத் தொகை: ரூ. 31,55,680
ஆண்டிற்கு ஒரே தவணையாக ரூ. 1.2 லட்சம் முதலீடு:
ஒவ்வொரு ஆண்டும் ஏப்ரல் 5-ஆம் தேதிக்குள் ஒரே தவணையாக ரூ. 1.2 லட்சம் வீதம் 15 ஆண்டுகளுக்கு முதலீடு செய்தால்:
மொத்த முதலீட்டுத் தொகை: ரூ. 18,00,000
கணக்கிடப்படும் வட்டி (7.1% அடிப்படையில்): ரூ. 14,54,568
15 ஆண்டுகள் கழித்து கிடைக்கும் மொத்த முதிர்வுத் தொகை: ரூ. 32,54,568
எந்த முதலீட்டு முறை அதிக லாபத்தைத் தரும்?
ஆண்டிற்கு ஒரே தவணையாக ரூ. 1.2 லட்சம் முதலீடு செய்யும் போது ரூ. 32.55 லட்சம் முதிர்வுத் தொகையாகக் கிடைக்கிறது. அதேவேளையில், மாதந்தோறும் ரூ. 10,000 முதலீடு செய்யும் போது ரூ. 31.56 லட்சம் மட்டுமே கிடைக்கிறது.
இதன் மூலம், ஒரே தவணையாக ஏப்ரல் 5-ஆம் தேதிக்குள் முதலீடு செய்யும் போது 15 ஆண்டுகளில் கூடுதலாக சுமார் ரூ. 99,000 லாபம் கிடைக்கிறது. இந்த வட்டி விகிதம் (7.1%) 15 ஆண்டுகளுக்கும் மாற்றமில்லாமல் தொடர்கிறது என்ற அடிப்படையில் இந்த கணக்கீடு செய்யப்பட்டுள்ளது.
பி.பி.எஃப். வரிச் சலுகைகள்
பி.பி.எஃப். திட்டம் ‘ட்ரிபிள் இ’ (Exempt-Exempt-Exempt) வரி விலக்கு வரம்பின் கீழ் வருகிறது. அதாவது முதலீடு செய்யும் தொகை, பெறப்படும் வட்டி மற்றும் முதிர்வுத் தொகை ஆகிய மூன்றிற்கும் வரி விலக்கு உண்டு. ஆனால், இந்த முதலீட்டு வரி விலக்கு பழைய வரி முறையில் (Old Tax Regime) மட்டுமே பொருந்தும்.
இத்திட்டம் 15 ஆண்டுகளில் முதிர்வடையும் என்றாலும், 7-வது நிதியாண்டில் இருந்து சில விதிகளுக்கு உட்பட்டு பகுதித் தொகையைத் திரும்பப் பெற அனுமதி உண்டு. கணக்கு முதிர்வடைந்த பிறகு, விரும்பினால் 5 ஆண்டுகள் கொண்ட தொகுப்புகளாக (5-year blocks) கணக்கை மேலும் நீட்டித்துக் கொள்ள முடியும்.