புதுச்சேரி சட்டமன்றத் தேர்தலில் வெற்றி பெற்று ஆட்சியை மீண்டும் அமைத்துள்ள என்.ஆர். காங்கிரஸ் – பாஜக கூட்டணி அரசாங்கம், அமைச்சர்களுக்கு இதுவரை இலாகாக்கள் ஒதுக்காததை கண்டித்து, அனைத்திந்திய இளைஞர் பெருமன்றம் சார்பில் இன்று புதுச்சேரி சட்டசபை வளாகம் முன்பு கண்டன ஆர்ப்பாட்டம் நடைபெற்றது. இதில் அமைப்பின் நிர்வாகிகள், இளைஞர்கள் மற்றும் பல்வேறு பகுதிகளைச் சேர்ந்த உறுப்பினர்கள் கலந்து கொண்டு அரசுக்கு எதிராக முழக்கங்களை எழுப்பினர்.
ஆர்ப்பாட்டத்தில் பேசிய நிர்வாகிகள், கடந்த மே 13ஆம் தேதி முதலமைச்சருடன் இரண்டு அமைச்சர்கள் பதவியேற்ற நிலையில், பின்னர் மீதமுள்ள இரண்டு அமைச்சர்களும் பதவியேற்றுக் கொண்டதாக குறிப்பிட்டனர். ஆனால், பதவியேற்று இரண்டு மாதங்கள் கடந்தும் அமைச்சர்களுக்கு எந்த இலாகாவும் ஒதுக்கப்படாதது புதுச்சேரி அரசியல் வரலாற்றிலேயே முன்னெப்போதும் இல்லாத நிகழ்வாக இருப்பதாக அவர்கள் குற்றம்சாட்டினர்.
அமைச்சர்களுக்கு பொறுப்புகள் வழங்கப்படாததால் எந்த அமைச்சர் எந்தத் துறையை கவனிக்கிறார் என்பது பொதுமக்களுக்கே அல்லாமல் அரசு அதிகாரிகளுக்குக் கூட தெளிவாக தெரியாத நிலை ஏற்பட்டுள்ளதாக அவர்கள் தெரிவித்தனர். இதன் காரணமாக பல்வேறு அரசுத் துறைகளில் முக்கிய கோப்புகள் தேக்கமடைந்து, நிர்வாக முடிவுகள் எடுக்கப்படாமல் உள்ளதாகவும், மக்கள் நலத்திட்டங்கள் செயல்படுத்தப்படுவதில் கடும் பாதிப்பு ஏற்பட்டுள்ளதாகவும் குற்றஞ்சாட்டினர்.
மேலும், புதிய திட்டங்களுக்கு ஒப்புதல் வழங்குதல், வளர்ச்சித் திட்டங்களை முன்னெடுத்துச் செல்வது, நலத்திட்ட நிதிகளை ஒதுக்குதல், பொதுமக்களின் மனுக்களுக்கு விரைந்து தீர்வு காணுதல் உள்ளிட்ட பணிகள் அனைத்தும் முடங்கியுள்ளதாகவும், இதனால் அரசு நிர்வாகத்தின் மீதான பொதுமக்களின் நம்பிக்கை நாளுக்கு நாள் குறைந்து வருவதாகவும் அவர்கள் தெரிவித்தனர்.
அரசின் இந்த காலதாமதம் நிர்வாக சீர்கேட்டை ஏற்படுத்துவதோடு மட்டுமல்லாமல், அரசு அதிகாரிகளும் முடிவெடுக்க முடியாத சூழலை உருவாக்கியுள்ளதாகவும், வளர்ச்சிப் பணிகள் பாதிக்கப்பட்டுள்ளதாகவும் ஆர்ப்பாட்டக்காரர்கள் குற்றம்சாட்டினர். மக்களின் அடிப்படை தேவைகள், உள்கட்டமைப்பு மேம்பாட்டு பணிகள், நலத்திட்டங்கள் உள்ளிட்ட பல்வேறு திட்டங்கள் தாமதமடைந்து வருவதால் பொதுமக்கள் நேரடியாக பாதிக்கப்படுவதாகவும் அவர்கள் தெரிவித்தனர்.
எனவே, பதவியேற்றுள்ள அனைத்து அமைச்சர்களுக்கும் உடனடியாக இலாகாக்களை ஒதுக்கி, அரசின் நிர்வாகத்தை முழுமையாக செயல்படுத்த நடவடிக்கை எடுக்க வேண்டும் என்றும், மக்கள் நலனுக்கான பணிகள் தடையின்றி நடைபெற அரசு விரைந்து முடிவெடுக்க வேண்டும் என்றும் அனைத்திந்திய இளைஞர் பெருமன்றம் வலியுறுத்தியது.
இந்த கோரிக்கைகளை வலியுறுத்தி நடைபெற்ற ஆர்ப்பாட்டத்தில், “அமைச்சர்களுக்கு உடனே இலாகா ஒதுக்கு”, “மக்கள் நலத்திட்டங்களை செயல்படுத்து”, “நிர்வாக முடக்கத்தை முடிவுக்கு கொண்டு வா” உள்ளிட்ட முழக்கங்கள் எழுப்பப்பட்டன. போராட்டத்தின் முடிவில், அரசாங்கம் உடனடியாக அமைச்சர்களுக்கு துறைகளை ஒதுக்கி, நிர்வாகத்தை சீர்படுத்தாவிட்டால் அடுத்த கட்டமாக மாநிலம் தழுவிய போராட்டங்களை முன்னெடுக்கப் போவதாக அனைத்திந்திய இளைஞர் பெருமன்ற நிர்வாகிகள் எச்சரிக்கை விடுத்தனர்.
செய்தி: பாபு ராஜேந்திரன் – புதுச்சேரி