லக்சயா அதிர்ச்சி தோல்வி: சீன மாஸ்டர்ஸ் பாட்மின்டனில்

சீனாவில், ‘சூப்பர் 750’ அந்தஸ்து பெற்ற மாஸ்டர்ஸ் பாட்மின்டன் தொடர் நடக்கிறது. ஆண்கள் ஒற்றையர் பிரிவு முதல் சுற்றில் இந்தியாவின் லக்சயா சென், கனடாவின் விக்டர் லாய் மோதினர். இதில் லக்சயா சென் 14-21, 7-21 என்ற கணக்கில் தோல்வியடைந்தார்.

மற்றொரு போட்டியில் இந்தியாவின் ஸ்ரீகாந்த், சீனதைபேயின் சி யு ஜென் மோதினர். அபாரமாக ஆடிய ஸ்ரீகாந்த் 21-16, 21-15 என்ற நேர் செட் கணக்கில் வெற்றி பெற்றார்.

பெண்கள் ஒற்றையர் பிரிவு முதல் சுற்றில் இந்தியாவின் தான்வி சர்மா, டென்மார்க்கின் அமாலி ஷூல்ஸ் மோதினர். இதில் தான்வி 21-16, 21-17 என்ற நேர் செட் கணக்கில் வெற்றி பெற்றார்.

மற்றொரு போட்டியில் இந்தியாவின் தேவிகா சிஹாக் 18-21, 15-21 என பல்கேரியாவின் கலோயானா நல்பான்டோவாவிடம் தோல்வியடைந்தார்.

ஆண்கள் இரட்டையர் பிரிவு முதல் சுற்றில் இந்தியாவின் சாத்விக்சாய்ராஜ், சிராக் ஷெட்டி ஜோடி 21-11, 21-16 என, மலேசியாவின் ஜுனைடி ஆரிப், காங் காய் ஜிங் ஜோடியை வென்றது.

கலப்பு இரட்டையர் பிரிவு முதல் சுற்றில் இந்தியாவின் துருவ் கபிலா, தனிஷா கிராஸ்டோ ஜோடி 21-8, 21-9 என தாய்லாந்தின் டான்கிட், டான்ரக் சேஹெங் ஜோடியை வீழ்த்தியது. மற்றொரு போட்டியில் இந்தியாவின் ரோஹன் கபூர், ருத்விகா ஷிவானி ஜோடி 16-21, 18-21 என சீனதைபேயின் குவான் ஜுன் வு, சியா ஹசின் லீ ஜோடியிடம் தோல்வியடைந்தது.