தி இந்தியன் எக்ஸ்பிரஸ் குழுமமும் ஓபன் ஏ.ஐ-யும் இன்று ஒரு மூலோபாயக் கூட்டாண்மையை அறிவித்துள்ளன. இந்தக் கூட்டாண்மை, எக்ஸ்பிரஸ் குழுமத்தின் நம்பகமான பத்திரிகைத் துறையை அதிகமான மக்கள் கண்டறிந்து, அதனுடன் ஈடுபட உதவும் வகையில் வடிவமைக்கப்பட்டுள்ளது.
இந்தச் செய்தியை ஆங்கிலத்தில் படிக்க கிளிக் செய்யவும்
இந்தக் கூட்டாண்மை, எக்ஸ்பிரஸ் குழும வெளியீடுகளின் செய்திகள் அல்லது உள்ளடக்கங்கள் சாட்.ஜி.பி.டி-யில் (ChatGPT) தோன்றும் விதத்தை மேம்படுத்தும்: தொடர்புடைய கேள்விகளுக்குப் பதிலளிக்கும் வகையில் தேர்ந்தெடுக்கப்பட்ட சுருக்க கருத்துக்கள் அல்லது முக்கிய கருத்துக்கள் காட்டப்படும்போது, முடிவுகள் அவற்றின் மூலத்தைத் தெளிவாக அடையாளம் காட்டி, அசல் கட்டுரைகளுக்கான நேரடி இணைப்புகளையும் கொண்டிருக்கும். இதன் மூலம், வாசகர்கள் வெளியீட்டாளரின் தளங்களில் முழுமையான செய்திகளையும் பகுப்பாய்வுகளையும் அணுக முடியும்.
இந்த ஆரம்பக்கட்ட கூட்டாண்மையில், எக்ஸ்பிரஸ் குழுமத்தின் வணிக நிறுவனங்களான தி இந்தியன் எக்ஸ்பிரஸ், தி ஃபைனான்சியல் எக்ஸ்பிரஸ் ஆகியவற்றின் உள்ளடக்கம் இடம்பெறும். மேலும், இது ஆங்கிலம், இந்தி, மராத்தி, மலையாளம், தமிழ், பெங்காலி மற்றும் குஜராத்தி உட்பட 7 மொழிகளில் நேரடிச் செய்திகள் மற்றும் காப்பகப்படுத்தப்பட்ட உள்ளடக்கத்தை கொண்டிருக்கும்.
இந்தியன் எக்ஸ்பிரஸ் டிஜிட்டலின் தலைமைச் செயல் அதிகாரி நந்தகோபால் ராஜன் கூறுகையில், “திட்டங்களை வகுக்கும் புலனாய்வுகள், உடனடிச் செய்திகள் மற்றும் அரசியல் களத்தின் அனைத்துத் தரப்பினரையும் உள்ளடக்கிய பரந்த குரல்கள் ஆகிய எங்களின் பாரம்பரியம், எக்ஸ்பிரஸ் குழுமத்தை இந்திய ஊடகத்துறையில் தனித்துவமானதாக ஆக்குகிறது. நாங்கள் எப்போதும் புதிய தொழில்நுட்பங்களுக்குத் திறந்த மனதுடன் இருக்கிறோம். இந்த கூட்டாண்மை, வாசகர்கள் எங்களின் பரந்த தேசிய பத்திரிகையாளர் வலையமைப்பின் பணிகளையும், எங்களின் துல்லியமான செய்தி அறிக்கைகளையும், தெளிவான மூலக் குறிப்புகளுடனும், மூலத்திற்கு நேரடி வழியுடனும் கண்டறிய ஒரு புதிய வழியை உருவாக்குகிறது. தொழில்நுட்பமானது, தகவல்களைக் கண்டறிந்து பயன்படுத்தும் முறைகளை மாற்றினாலும், நாங்கள் வெளியிடும் அனைத்திற்கும் முழுமையான தலையங்கப் பொறுப்புடன், நம்பகமான பத்திரிகைத் துறைக்கே நாங்கள் முன்னுரிமை அளிக்கிறோம்,” என்று கூறினார்.
ஓபன் ஏ.ஐ-யின் ஊடகப் பங்களிப்புகள் துணைத் தலைவர் வருண் ஷெட்டி கூறுகையில், “இந்தியன் எக்ஸ்பிரஸ், ஆழமான புலனாய்வுகள் மற்றும் பாரபட்சமற்ற செய்தி அறிக்கைகளின் ஒரு அசாதாரணமான பாரம்பரியத்தைக் கொண்டுள்ளது. இது, இந்தியாவை அதன் முழு ஆழத்திலும் சிக்கலான தன்மையிலும் மக்கள் புரிந்துகொள்ள உதவுகிறது. தெளிவான மூலக் குறிப்புகள் மற்றும் நேரடி இணைப்புகளுடன், அந்தப் பணிகளை மேலும் பலர் கண்டறிய செயற்கை நுண்ணறிவு (AI) உதவ வேண்டும் என்று நாங்கள் விரும்புகிறோம். இது, வெளியீட்டாளர்களுடன் ஆக்கப்பூர்வமாகப் பணியாற்றுவதற்கும், பத்திரிகையாளர்கள், வாசகர்கள் மற்றும் ஒரு வலுவான செய்திச் சூழலை ஆதரிக்கும் தொழில்நுட்பத்தை உருவாக்குவதற்கும் நாங்கள் கொண்டுள்ள அர்ப்பணிப்பைப் பிரதிபலிக்கிறது,” என்று கூறினார்.
இந்தியன் எக்ஸ்பிரஸ் குழுமம், தனது பத்திரிகைத் துறையின் மீது முழுமையான மற்றும் சுதந்திரமான தலையங்கக் கட்டுப்பாட்டைத் தொடர்ந்து கொண்டிருக்கும். குழுமம் எந்தச் செய்திகளை வெளியிடுகிறது, அந்தச் செய்திகள் எவ்வாறு தயாரிக்கப்படுகின்றன, அல்லது அவை எட்டும் தலையங்க முடிவுகள் ஆகியவற்றைத் தீர்மானிப்பதில் ஓபன் ஏ.ஐ-க்கு எந்தப் பங்கும் இருக்காது.
இந்த கூட்டாண்மையின் ஒரு கூடுதல் பகுதியாக, ஓபன் ஏ.ஐ தொழில்நுட்பம் மூலம், எக்ஸ்பிரஸ் குழுமம் முழுவதும் புதிய வாசகர் அனுபவங்களையும் நடைமுறைப் பணிப்பாய்வுகளையும் எவ்வாறு ஆதரிக்க முடியும் என்பதை இரு நிறுவனங்களும் ஆராயும். ஆவணக்காப்பகங்களைக் கண்டறிதல், ஆராய்ச்சி, தரவுப் பகுப்பாய்வு, மொழிபெயர்ப்பு, வாசகர் சேவைகள் மற்றும் வணிகச் செயல்பாடுகள் ஆகியவை ஆய்வுக்கான சாத்தியமான துறைகளாகும். இந்தக் கருவிகளின் எந்தவொரு தலையங்கப் பயன்பாடும் குழுமத்தின் தரநிலைகள், கொள்கைகள் மற்றும் மனித மேற்பார்வைக்கு உட்பட்டே இருக்கும்.
நம்பகமான தகவல்களைக் கண்டறிவதை மேம்படுத்துவதற்கும், வெளியீட்டாளர்களுக்காக செயற்கை நுண்ணறிவின் பொறுப்பான பயன்பாடுகளை உருவாக்குவதற்கும், அசல் செய்திகளுடன் பார்வையாளர்கள் ஈடுபடுவதற்கான புதிய வழிகளை உருவாக்குவதற்கும், உலகெங்கிலும் உள்ள செய்தி நிறுவனங்களுடன் ஓபன் ஏ.ஐ செய்துவரும் பணிகளின் தொடர்ச்சியாக இந்தக் கூட்டாண்மை அமைகிறது.