இந்தியாவில் சுற்றுப்பயணம் செய்தி 3 போட்டிகள் கொண்ட டி-20 தொடரில் ஆப்கானிஸ்தான் கிரிக்கெட் அணி விளையாடுகிறது. இந்த 3 போட்டிகளும் டெல்லியிலேயே நடக்கின்றன. அதன்படி, இந்தியா-ஆப்கானிஸ்தான் அணிகள் இடையிலான முதலாவது டி-20 கிரிக்கெட் போட்டி டெல்லியில் உள்ள அருண் ஜெட்லி ஸ்டேடியத்தில் இன்று இரவு 7:30 மணிக்கு தொடங்கி நடக்கிறது. 2-வது போட்டி 15-ந்தேதியும், 3-வது போட்டி 17- ந்தேதியும் நடக்கின்றன.
இந்த செய்தியை ஆங்கிலத்தில் படிக்கவும்
ஸ்ரேயாஸ் ஐயர் தலைமையில் முதல் உள்ளூர் தொடர்
ஸ்ரேயாஸ் ஐயர் 20 ஓவர் அணியின் கேப்டன் பொறுப்பை ஏற்ற பிறகு இந்திய அணி உள்ளூரில் விளையாடும் முதல் தொடர் இதுவாகும். உலகக்கோப்பை போட்டிக்கு பிறகு ஸ்ரேயாஸ் கேப்டனானதும் அயர்லாந்து (0-2) இங்கிலாந்து (0-4) தொடர்களில் தோல்வியை சந்தித்த இந்திய அணி கடைசியாக நடந்த ஜிம்பாப்வே தொடரை (3-0) முழுமையாக கைப்பற்றி வெற்றிப்பாதைக்கு திரும்பியது.
ஆசிய விளையாட்டு போட்டிக்கு ஆயத்தமாவதற்கு இந்த தொடரை சரியாக பயன்படுத்தி கொள்ள இரு அணிகளும் ஆர்வம் காட்டும். ஆப்கானிஸ்தானுக்கு எதிராக இதுவரை தோல்வியை சந்திக்காத இந்தியா கூடுதல் நம்பிக்கையுடன் களம் இறங்கும். அத்துடன் உள்ளூர் சூழல் அனுகூலமாக இருக்கும்.
18 முறை
ஆப்கானிஸ்தான் அணியை பொறுத்தமட்டில், சர்வதேச கிரிக்கெட்டில் 18 முறை இந்தியாவுடன் மோதி இருக்கிறது. அதில் ஒன்றில் கூட வெற்றி பெற்றது கிடையாது. இதுவரை இந்தியாவுக்கு எதிராக 2 டெஸ்டில் ஆடி இரண்டிலும் தோற்றுள்ளது. 7 ஒரு நாள் போட்டியில் விளையாடி 6-ல் தோற்று இருக்கிறது. ஒரு ஆட்டம் டை (சமன்) ஆனது.
9 டி20 போட்டியில் ஆடி 8-ல் தோல்வி கண்டுள்ளது. ஒரு ஆட்டம் முடிவு இல்லாமல் போனது. இந்த மோசமான சாதனையை மாற்றி முதல் வெற்றியை பெற அந்த அணியினர் தீவிரம் காட்டுவார்கள். போட்டி தொடரை வெற்றியுடன் தொடங்க இரு அணிகளும் வரிந்து கட்டும் என்பதால் இந்த ஆட்டத்தில் விறுவிறுப்புக்கு பஞ்சம் இருக்காது.