இந்திய அணிக்கு எதிரான டி20 தொடரை நடத்தும் ஆப்கானிஸ்தான் அணி, இந்திய பிட்சை வாடகைக்கு எடுத்து, இத்தொடரை நடத்த உள்ளது.
அதாவது, வரலாற்றிலேயே முதல் முறையாக, இந்திய அணி தனது சொந்த மண்ணில், வெளிநாட்டு அணியாக விளையாட உள்ளது. டெல்லியில் இருக்கும், அருண் ஜெட்லி மைதானத்தைதான், ஆப்கானிஸ்தான் அணி வாடகைக்கு எடுத்துள்ளது. மூன்று டி20 போட்டிகளும் அந்த மைதானத்தில்தான் நடைபெறும்.
அட்டவணை என்ன? இரு அணிகளுக்கும் இடையிலான முதல் டி20 போட்டி, செப்டம்பர் 13ஆம் தேதி நடைபெறும். அடுத்து, இரண்டாவது போட்டி செப்டம்பர் 15ஆம் தேதியும், மூன்றாவது போட்டி 17ஆம் தேதியும் நடைபெறும் என அறிவிக்கப்பட்டுளது.
நேரம் என்ன? மூன்று போட்டிகள் கொண்ட டி20 தொடரின் அனைத்து போட்டிகளும் இந்திய நேரப்படி, இரவு 7 மணிக்குதான் துவங்கும்.
எதில் பார்க்க முடியும்? இத்தொடரை ஸ்போர்ட்ஸ் 18 நிறுவனம் ஒளிபரப்பு செய்யும். ஜியோ ஹாட் ஸ்டார் ஆப் மூலம் இத்தொடரை நேரலையில் பார்க்க முடியும்.
ஐசிசி டி20 தரவரிசையில், இந்திய அணி, முதல் இடத்தில் இருக்கிறது. ஆப்கானிஸ்தான் அணி, டி20 பார்மெட்டில் தொடர்ச்சியாக அபாரமாக விளையாடி வந்த நிலையில், சமீப காலமாகவே சொதப்பி வருகிறார்கள். இதனால், தற்போது தரவரிசையில் 10ஆவது இடத்தை மட்டுமே பிடிக்க முடிந்துள்ளது.
ஆப்கானிஸ்தான் அணி, கடைசியாக டி20 உலகக் கோப்பை 2026 தொடரில் ஆடியப் பிறகு, முதல் முறையாக டி20 தொடரில் விளையாட உள்ளனர். இந்த டி20 உலகக் கோப்பை தொடரில், தென்னாப்பிரிக்க அணிக்கு எதிராக 2 சூப்பர் ஓவர்களில் விளையாடி, இறுதியில் தோல்வியை சந்தித்தனர். நியூசிலாந்து அணிக்கு எதிராகவும் போராடி, 5 விக்கெட்கள் வித்தியாசத்தில் தோற்றனர். கனடா மற்றும் ஐக்கிய அரபு அமீரகம் ஆகிய அணிகளுக்கு எதிராக மட்டும் அபார வெற்றிகளை பெற முடிந்தது.
இந்திய டி20 அணி, இக்கட்டான நிலையில்தான் இருக்கிறது. இங்கிலாந்துக்கு எதிரான 5 டி20 போட்டிகள், அடுத்து அயர்லாந்து அணிக்கு எதிராக 2 டி20 போட்டிகள் என 7 போட்டிகளில் ஒரு வெற்றியைக் கூட பெறவில்லை. இதனைத் தொடர்ந்து, ஜிம்பாப்வே அணிக்கு எதிரான டி20 தொடரை கைப்பற்றினார்கள். ஆப்கானிஸ்தான் அணி, சிறந்த கிரிக்கெட்டை ஆடினால், இந்திய அணிக்கு கடும் நெருக்கடியை ஏற்படுத்த முடியும் எனக் கருதப்படுகிறது.
இந்திய அணிப் பட்டியல்: ஷ்ரேயஸ் ஐயர் (கேப்டன்), திலக் வர்மா (துணைக் கேப்டன்), அபிஷேக் சர்மா, வைபவ் சூர்யவன்ஷி, சஞ்சு சாம்சன், இஷான் கிஷன், ஷிவம் துபே, அக்சர் படேல், நிதிஷ் ரெட்டி, வாஷிங்டன் சுந்தர், ஜஸ்பரீத் பும்ரா, அர்ஷ்தீப் சிங், ஹர்ஷித் ராணா.
ஆப்கானிஸ்தான் அணி பட்டியல் இன்னமும் அறிவிக்கப்படவில்லை.
இந்திய அணியில், ஓபனர்கள் இடங்களுக்கு பலத்த போட்டி நிலவி வருகிறது. அபிஷேக் சர்மா, வைபவ் சூர்யவன்ஷி, சஞ்சு சாம்சன் ஆகிய திறமையான பேட்டர்கள், ஓபனர்கள் இடங்களுக்கு மோதி வருகின்றனர். இதில், யாருடைய இடமும் இன்னமும் உறுதியாகவில்லை. இதனால், ஆப்கானிஸ்தான் தொடரில், யாருக்கு வாய்ப்பு கிடைக்கும் என்ற எதிர்பார்ப்பு இருக்கிறது. குறிப்பாக, சாம்சனுக்கு வாய்ப்பு கிடைக்குமா என்ற கேள்வியும் இருக்கிறது.