மும்பை: இந்திய கிரிக்கெட் அணி அடுத்த மாத தொடக்கத்தில் இலங்கையில் சுற்றுப்பயணம் செய்து 2 டெஸ்ட் போட்டிகள் கொண்ட தொடரில் விளையாட உள்ளது. முதல் போட்டி ஆகஸ்ட் 15 முதல் 19 வரை காலே நகரிலும், 2-வது மற்றும் கடைசி டெஸ்ட் போட்டி ஆகஸ்ட் 23 முதல் 27 வரை கொழும்பு நகரிலும் நடைபெறுகிறது.
இந்தத் தொடர் ஐசிசி உலக டெஸ்ட் சாம்பியன்ஷிப் சுழற்சியின் அங்கமாக உள்ளது. இந்த போட்டிகளுக்கு முன்னதாக இலங்கை மண்ணில் 4 நாட்கள் கொண்ட பயிற்சி ஆட்டம் ஒன்றிலும் இந்திய அணி விளையாட உள்ளது. இந்த போட்டி ஆகஸ்ட் 7-ல் கொழும்பு நகரில் தொடங்குகிறது.
இந்நிலையில் இலங்கை டெஸ்ட் தொடருக்கான இந்திய அணி நேற்று அறிவிக்கப்பட்டது. இதில் மத்திய பிரதேசத்தை சேர்ந்த 33 வயதாகும் ஆஃப் ஸ்பின் ஆல் ரவுண்டரான சரன்ஷ் ஜெயின் அறிமுக வீரராக சேர்க்கப்பட்டுள்ளார். சமீபத்தில் இலங்கை ‘ஏ’ அணிக்கு எதிராக நடைபெற்ற 2-வது டெஸ்ட் போட்டியில் இந்தியா ‘ஏ’ அணியில் இடம்பெற்றிருந்த சரன்ஷ் ஜெயின் 6 விக்கெட்டுகள் வீழ்த்தியதுடன் 70 ரன்கள் சேர்த்து அணியின் வெற்றிக்கு பங்களிப்பு செய்திருந்தார்.
வாஷிங்டன் சுந்தர் காயம் காரணமாக விளையாடாததால் சரன்ஷ் ஜெயின் அணிக்குள் கொண்டுவரப்பட்டுள்ளார். சாய் சுதர்சன், ஜஸ்பிரீத் பும்ரா ஆகியோர் அணியில் சேர்க்கப்பட்டிருந்தாலும் உடற்தகுதியை பொறுத்தே அவர்கள், விளையாடுவார்கள் என தெரிவிக்கப்பட்டுள்ளது.
அணி விவரம்:
ஷுப்மன் கில் (கேப்டன்), கே.எல்.ராகுல், யஷஸ்வி ஜெய்ஸ்வால், சாய் சுதர்சன், தேவ்தத் படிக்கல், ரிஷப் பந்த், சரன்ஷ் ஜெயின், துருவ் ஜூரெல், ரவீந்திர ஜடேஜா, குல்தீப் யாதவ், மானவ் சுதார், ஜஸ்பிரீத் பும்ரா, முகமது சிராஜ், பிரசித் கிருஷ்ணா, குர்னூர் பிரார்.