லண்டன் கார் ரேஸ்: சிறு விபத்தை எதிர்கொண்டு சாதித்த அஜித்; நேரில் கண்டு களித்த விஜய்- த்ரிஷா

லண்டன் சில்வர்ஸ்டோன் சுற்றில் நடைபெற்ற 2026 மிச்செலின் லீ மேன்ஸ் கப் கார் பந்தயம் பல்வேறு சுவாரஸ்யமான நிகழ்வுகளுடன் நிறைவடைந்துள்ளது. இங்கிலாந்திற்கு அரசு முறைப் பயணம் மேற்கொண்டுள்ள தமிழ்நாடு முதலமைச்சர் விஜய், நடிகர் அஜித் குமாரின் சிறப்பு அழைப்பின் பேரில் இந்நிகழ்வில் நேரில் கலந்து கொண்டார். போட்டியைக் காண அமைச்சர் ஆதவ் அர்ஜுனா, நடிகை திரிஷா மற்றும் சில பிரபலங்களும் சென்றனர்.

பந்தயக் களத்திற்கு வருகை தந்த முதலமைச்சரை அஜித் ஓடிச் சென்று கட்டித்தழுவி வரவேற்றார். தொடர்ந்து, பச்சைக்கொடி அசைத்து போட்டியைத் தொடங்கி வைத்த முதலமைச்சர் விஜய், போட்டி அதிகாரப்பூர்வமாகத் தொடங்குவதையும் சிறப்பித்தார். தமிழ்நாட்டில் அமைக்கப்படவுள்ள மோட்டார் ஸ்போர்ட்ஸ் சிட்டி திட்டத்திற்காக, சர்வதேசத் தரத்திலான பந்தயப் பாதைகள் மற்றும் பாதுகாப்பு முறைகளைப் பார்வையிடுவதும் அவரது பயணத்தின் நோக்கமாக இருந்தது.

மொத்தம் 44 கார்கள் பங்கேற்ற இந்த இரண்டு மணி நேரப் பந்தயத்தில், நடிகர் அஜித் குமார் மற்றும் பிரெஞ்சு ஓட்டுநர் ரோமைன் வோஸ்னியாக் இணைந்த ‘அஜித் ரெட்ஆண்ட் பை விராஜ்’ அணியின் 16-ஆம் எண் கார் களமிறங்கியது. தகுதிச் சுற்றில் LMP3 Pro/Am பிரிவில் 8-வது இடத்தைப்பிடித்த அஜித்தின் கார், பந்தயத்தின் ஆரம்பக் கட்டத்தில் சீராகச் சென்று 16-வது இடத்திலிருந்து படிப்படியாக 3-வது இடம் வரை முன்னேறியது.

இருப்பினும், பந்தயத்தின் நடுவே அஜித்தின் கார் எதிர்பாராதவிதமாக விபத்துக்குள்ளாகித் தண்டவாளத்தை விட்டு விலகிப் பக்கவாட்டில் சென்றது. உடனடியாக மீட்புக் குழுவினர் விரைந்து காரைச் சீரமைத்தனர். இந்தத் தடங்கலால் வெற்றி பெற்ற காரை விட 3 லேப்கள் பின்தங்கிய அஜித் அணி, 50 லேப்கள் கொண்ட 5.1 கி.மீ சுற்றளவுடைய இந்தப் போட்டியை ஒட்டுமொத்தமாக 38-வது இடத்தில் நிறைவு செய்தது.

போட்டியின் முடிவில் ஏ.என்.எஸ். மோட்டார்ஸ்போர்ட் அணி முதலிடத்தையும், ஆர்.எஸ்.ஜி.பி அணி இரண்டாம் இடத்தையும் பிடித்தன. அதே வேளையில், ‘டீம் விராஜ்’ சார்பில் களம் கண்ட அஜித்தின் அணி தனது பிரிவில் 3-வது இடத்தைப் பிடித்து அசத்தியது. 2026 சீசனின் 5-வது சுற்றான இப்போட்டியைத் தொடர்ந்து, இறுதிப் போட்டி வரும் அக்டோபர் மாதம் போர்ச்சுகலின் போர்ட்டிமாவோவில் நடைபெறவுள்ளது.